Apple бұл ауысымды алғаш сәуір айында жариялаған болатын. Компанияның директорлар кеңесі Джон Тернустың кандидатурасын бірауыздан мақұлдаған. Тернус бұған дейін Apple компаниясында аппараттық инженерия жөніндегі аға вице-президент қызметін атқарды.
Кук Apple-ге не қалдырды?
Тим Кук Apple компаниясының басшылығына 2011 жылы, Стив Джобс қызметтен кеткеннен кейін келді. Оның 15 жылға жуық басқару кезеңінде компанияның нарықтық құны бірнеше есе өсті. Financial Times мәліметінше, Apple-дің капитализациясы Кук келген кездегі шамамен 350 млрд доллардан 4 трлн долларға жуық деңгейге жетті.
Осы кезеңде Apple iPhone-мен ғана шектелмей, Apple Watch, AirPods, Apple Music, Apple TV және Vision Pro секілді жаңа өнімдер мен сервистерін дамытты. Компанияның әлем бойынша белсенді құрылғыларының саны 2,5 млрд-тан асты.
Куктың басшылығы кезінде Apple акционерлеріне 1 трлн доллардан астам қаражат қайтарылған. Сонымен қатар компания өндіріс пен өз чиптерін әзірлеуге көбірек көңіл бөліп, сервистік бағытты айтарлықтай кеңейтті.
Жаңа CEO алдында қандай міндет тұр?
1 қыркүйектен бастап компания тізгіні Джон Тернусқа өтеді. Ол Apple-дегі техникалық бағытқа жақсы таныс маман және компанияда ұзақ жылдар бойы аппараттық өнімдерді дамытуға жауапты болды.
Тернус үшін басты мәселелердің бірі — жасанды интеллект саласындағы позицияны күшейту. Сарапшылар Apple-дің AI бағытында кейбір бәсекелестерінен кейін қалғанын атап отыр. Компанияға сонымен қатар Қытайдағы өндіріс тізбегіне тәуелділік, реттеушілердің қысымы және жаңа технологиялық өнімдерге қатысты жоғары күтулер сияқты мәселелерді шешуге тура келеді.
Жаңа басшының алғашқы ірі сынақтарының бірі де алыс емес. Apple 9 қыркүйекте жаңа өнімдерінің тұсаукесерін өткізуді жоспарлап отыр. Бұл шара Джон Тернустың CEO ретіндегі алғашқы ірі презентациясы болмақ. (reuters.com)
Ал Тим Кук компаниядан толық кетпейді. Ол Apple-дің атқарушы төрағасы ретінде стратегиялық мәселелерге қатысып, оның ішінде әлем елдерінің мемлекеттік органдарымен байланыс бағытында компанияға қолдау көрсетеді. (Apple)
