Токаев ядролық державаларды келіссөзге және қауіп-қатерді азайтуға шақырды
Қасым-Жомарт Тоқаев Халықаралық ядролық сынақтарға қарсы іс-қимыл күніне орай үндеу жасап, ядролық қаруды қолдану қаупін жоюға бағытталған көпжақты қадамдарды жеделдетуге шақырды. Президент Қазақстанның антиядролық ұстанымы өзгермейтінін айтты.
Қазақстан президенті Қасым-Жомарт Тоқаев Халықаралық ядролық сынақтарға қарсы іс-қимыл күніне орай мәлімдеме жасады. Ол ядролық державаларды келіссөзге келіп, ядролық қаруды қолдану қаупін жоюға бағытталған қадамдарды күшейтуге үндеді.
Тоқаев бұл күнді БҰҰ Бас Ассамблеясы Қазақстанның бастамасымен бекіткенін еске салды. Оның айтуынша, Семей ядролық полигонының жабылғанына 35 жыл толды, ал онда жүргізілген сынақтар ондаған жыл бойы адамдардың денсаулығына және қоршаған ортаға зиян келтірді.
«Бұл күн әлемге ядролық сынақтардың ауыр салдарын және олардың қайталануына жол бермеу қажеттігін еске салуы тиіс», — деді президент.
Мемлекет басшысы Қазақстан әлемдегі төртінші ірі ядролық арсеналдан өз еркімен бас тартып, бейбітшілік, қауіпсіздік және орнықты даму жолын таңдағанын атап өтті. Оның сөзінше, елдің жаһандық антиядролық қозғалыстағы жетекші ұстанымы өзгермейді.
Тоқаев ядролық державалар арасындағы келіссөздерді, Ядролық сынақтарға жаппай тыйым салу туралы шарттың тезірек күшіне енуін және ядролық қаруды қолдану қатерін жоюға бағытталған көпжақты әрекеттерді қолдауға шақырды.
Президент сондай-ақ атом энергиясын бейбіт мақсатта пайдалануға тоқталды. Ол бүкілхалықтық референдумда қазақстандықтар ядролық энергетиканы дамытуға қолдау білдіргенін айтып, бұл шешім Қазақстанның экономикалық және ғылыми-технологиялық дамуына ұзақ мерзімді негіз қалайтынын жеткізді.