Ресейліктерге АҚШ визасын алуға қайта мүмкіндік берілді
АҚШ-та федералдық сот Дональд Трамп әкімшілігінің 75 ел азаматтарына, оның ішінде Ресей азаматтарына иммиграциялық виза беруді уақытша тоқтатқан шешімін заңсыз деп танып, күшін жойды. Бұл туралы Newsroom.kz хабарлады.
Манхэттендегі федералдық судья Жаннетт Варгас АҚШ Мемлекеттік хатшысы Марко Рубионың мұндай шектеу енгізу кезінде өз өкілеттігін асыра пайдаланғанын мәлімдеді. Сот шешіміне сәйкес, визаны тек адамның азаматтығына қарап жаппай шектеуге болмайды, ал өтініштерді қарау жеке тәртіппен жүргізілуі тиіс.
Шектеу 2026 жылдың қаңтарында енгізіліп, 75 мемлекеттің азаматтарына қатысты иммиграциялық визаларды өңдеуді тоқтатқан. АҚШ билігі бұл елдерден келген өтініш берушілердің мемлекеттік әлеуметтік көмекке тәуелді болу қаупі жоғары екенін алға тартқан.
Сот шешімі Ресей азаматтарына АҚШ визасы автоматты түрде беріледі дегенді білдірмейді. Өтініш берушілер бұрынғыдай белгіленген талаптарға сай болуы және консулдық тексеруден өтуі қажет.
Сондай-ақ бұл шешім туристік немесе студенттік визаларға қатысты емес, негізгі мәселе 75 ел азаматтарына берілетін иммиграциялық визаларды өңдеуге қойылған шектеуге қатысты болған.