Теңге неге күрт күшейді? Қазақстан валютасының 2026 жылғы рекорды
Теңге 2026 жылдың басынан бері долларға шаққанда 9,7 пайызға нығайып, Еуропа мен Азиядағы ең жақсы нәтиже көрсеткен валюталардың біріне айналды. Қазір доллар шамамен 458 теңге болса, былтыр қазанда бұл көрсеткіш 549 теңгеден асқан еді. Бұл туралы Newsroom.kz хабарлайды.
Сарапшылар теңгенің нығаюын бірнеше фактормен байланыстырады. Соның бірі – шетелдік инвесторлардың Қазақстанның мемлекеттік облигацияларына қызығушылығының артуы. Бір жыл ішінде олардың теңгедегі бағалы қағаздарға салған қаражаты шамамен 2 млрд доллардан 5 млрд долларға дейін өскен.
Шетелдіктер облигация сатып алу үшін долларын теңгеге айырбастайды. Осылайша ұлттық валютаға сұраныс артады.
Теңге бағамына бұдан бөлек мұнай бағасы, инфляция, Ұлттық банктің саясаты және Қазақстанның халықаралық қаржы нарығына интеграциялануы әсер етіп отыр.
Ал теңгенің одан әрі күшеюі шетел капиталының қозғалысына, мұнай бағасына және Ұлттық банктің шешімдеріне байланысты болады.