Батыс Қазақстанда 1 059 қазандық қысқа дайындалып жатыр: нысандардың дайындығы қанша пайыз?

Әлеуметтік нысандардың дайындығы қанша?

Облыс әкімінің 2026 жылғы 5 мамырдағы №106 қаулысымен жылыту маусымына дайындық жұмыстарын үйлестіретін облыстық штаб құрылған. Әкімдік мәліметіне сәйкес, қазіргі уақытта әлеуметтік нысандардың дайындық деңгейі әр салада әртүрлі.

Атап айтқанда:

денсаулық сақтау саласындағы 356 нысан — 80%;

білім беру саласындағы 604 нысан — 85%;

мәдениет саласындағы 516 нысан — 87%;

спорт саласындағы 28 нысан — 75%;

жұмыспен қамту және әлеуметтік қорғау саласындағы 14 нысан — 64%.

Ал облыстағы 2 530 көппәтерлі тұрғын үйдің дайындық деңгейі 80 пайызды құрайды. Яғни ең жоғары көрсеткіш мәдениет саласындағы нысандарда болса, ең төмен дайындық жұмыспен қамту және әлеуметтік қорғау саласындағы ғимараттарда тіркелген.

1 059 қазандықтың жағдайы қандай?

Батыс Қазақстан облысының аумағында әлеуметтік нысандарды тұрақты жылумен қамтамасыз ететін 1 059 автономды қазандық жұмыс істейді. Қазір барлық қазандықта 2026–2027 жылғы жылыту маусымына дайындық жұмыстары жүргізілуде. Олардың қатарында қазандықтар мен ішкі жылу жүйелерін жуу, гидравликалық сынақтан өткізу, техникалық қызмет көрсету, ақаулы жабдықтарды жөндеу және ауыстыру жұмыстары бар. Сонымен қатар мамандар сорғыларды, бекіту арматураларын және автоматика жүйелерін тексеріп жатыр. Түтін мұржалары мен газ шаруашылығына да техникалық тексеру жүргізілуде. Басқарманың мәліметінше, қазіргі таңда облыстағы барлық автономды қазандықтардың техникалық жағдайы қанағаттанарлық. Дайындық жұмыстары облыстық штабтың бақылауында.

Жылу энергетикасына қатысты жұмыстардың 76 пайызы орындалды

«Жайықжылуқуат» АҚ өз қаражаты есебінен жылыту маусымына дайындық жұмыстарын жүргізіп жатыр. Компания газтурбиналық қондырғы Н-25-ке, №3 және №12 қазандық агрегаттарына күрделі жөндеуді аяқтаған. Қазіргі уақытта №7 қазандық агрегатына, қосалқы жабдықтарға және жылу желілеріне жөндеу жүргізілуде. Бұл жұмыстардың жалпы орындалу деңгейі 76 пайызға жеткен. 377 шақырымнан астам электр желісі жөнделеді «Батыс Қазақстан АЭЖК» АҚ да жылыту маусымына дайындық аясында бірқатар жұмыстарды жоспарлаған.

Компанияның өз қаражаты есебінен:

377,4 км электр желісін;

35 кВ-тық 19 қосалқы станцияны;

70 кешенді трансформаторлық қосалқы станцияны жөндеу жоспарланған.

Қазіргі уақытта бұл жұмыстардың орындалу деңгейі 52 пайызды құрайды.

5,4 шақырым су және кәріз желісі жөнделіп жатыр

«Батыс су арнасы» ЖШС де дайындық жұмыстарын жүргізуде.

Компания өз қаражаты есебінен 5,4 шақырым су құбыры мен кәріз желілерін күрделі жөндеуден өткізіп жатыр.

Қазіргі уақытта жұмыстардың 80 пайызы орындалған.

Бұл жұмыстардың барлығы алдағы жылыту маусымының тұрақты өтуіне дайындық шараларының бір бөлігі.

Апаттық қазандықтар бар ма?

Басқарманың редакция сауалына берген жауабында облыста апаттық немесе тәуекелі жоғары қазандықтар бойынша жеке нысандар көрсетілмеген.

Керісінше, ведомство мәліметінше, қазіргі уақытта облыстағы автономды қазандықтардың техникалық жағдайы қанағаттанарлық.

Жөндеу және техникалық қызмет көрсету жұмыстары бекітілген жоспар-кестеге сәйкес кезең-кезеңімен жалғасып жатыр.

Жылыту маусымына дейін бәрі аяқтала ма?

Басқарманың мәліметінше, барлық жоспарлы жөндеу жұмыстары жылыту маусымы басталғанға дейін аяқталады.

Осылайша, Батыс Қазақстан облысында алдағы қысқа дайындық бірнеше бағыт бойынша қатар жүріп жатыр. Әлеуметтік нысандар мен көппәтерлі үйлердің дайындығы жалғасса, қазандықтар, жылу, су және электр желілерінде жөндеу жұмыстары жүргізілуде.

Қазіргі көрсеткіштер бойынша ең жоғары дайындық мәдениет саласындағы нысандарда — 87 пайыз, ал ең төмен көрсеткіш жұмыспен қамту және әлеуметтік қорғау саласында — 64 пайыз. Көппәтерлі үйлердің дайындығы 80 пайыз болса, «Жайықжылуқуат» АҚ-ның жөндеу жұмыстары 76 пайызға, «Батыс су арнасының» жұмыстары 80 пайызға, ал электр желілері бойынша жұмыстар 52 пайызға орындалған.