Павлодарда әйел 800 мың теңге үшін туған қызын сатпақ болған
Павлодарда жаңа туған сәбиін ақшаға бермек болған әйел сотталды. Түркістан тұрғыны қызын әлі дүниеге әкелмей тұрып әлеуметтік желіден сатып алушы іздеп, баланы 800 мың теңгеге бағалаған. Алайда келісілген мәміле құқық қорғау органдарының бақылауына түсіп, нәрестені беру сәтінде оның әрекеті әшкереленді, деп хабарлайды Newsroom.kz тілшісі.
Оқиға бір сәттік шешімнен емес, баланың дүниеге келуіне дейін басталған. Сот материалдарына сәйкес, 2002 жылы туған Түркістан тұрғыны қаржылық қиындыққа тап болып, жүктілік кезінде болашақ сәбиін сатуға шешім қабылдаған.
Ол әлеуметтік желідегі бала асырап алуға арналған қауымдастықтардың біріне хабарландыру жариялап, сол жерден болашақ сатып алушысын тапқан. Тараптар жаңа туған қызды 800 мың теңгеге беру туралы келіскен. 2026 жылғы 28 наурызда әйел Павлодар облыстық перинаталдық орталығында дені сау қыз дүниеге әкелген. Алайда ана мен баланың бірге болуы ұзаққа созылмаған.
Үш күннен кейін, 31 наурызда Павлодардағы пәтерлердің бірінде нәрестені сатып алушыға беру жоспарланған. Әйел баланы медициналық құжаттарымен бірге тапсырған. Бірақ оның алдында тұрған адам шын мәнінде құқық қорғау органдары ұйымдастырған арнайы іс-шараға қатысқан сатып алушы болған.
Келісілген мәміле құқық қорғау органдарының бақылауында өткен. Әйелге беру үшін алдын ала белгіленген купюралар дайындалып, олардың нөмірлері тіркелген. Нәрестені құжаттарымен бірге тапсырған әйел сол сәтте 100 мың теңгені алған. Ақша қолына тигеннен кейін арнайы операция жүргізген қызметкерлер оны ұстаған.
Осы іс бойынша Павлодар қаласының кәмелетке толмағандардың істері жөніндегі мамандандырылған ауданаралық соты әйелді Қазақстан Қылмыстық кодексінің 135-бабының 1-бөлігі бойынша, яғни кәмелетке толмағандар саудасы үшін кінәлі деп таныды.
Сот оған 5 жыл бас бостандығынан айыру жазасын тағайындаған. Жазаны орташа қауіпсіздік мекемесінде өтеу көзделген. Алайда сот жазаны бірден орындауға жібермеген. Әйелдің кішкентай баласы бар екенін ескере отырып, Қылмыстық кодекстің 74-бабы негізінде бас бостандығынан айыру жазасын орындау 5 жылға кейінге қалдырылған.