Қазақстанда аптап ыстық пен дауылды ауа райы күтіледі
10 тамызда елдің бірқатар өңірінде ауа райы күрт құбылады. Оңтүстікте аптап ыстық сақталса, кей жерлерде найзағай ойнап, бұршақ жауып, жел күшеюі мүмкін. Бұл туралы Newsroom.kz хабарлайды.
Ең жоғары температура Қызылорда облысында болжанып отыр. Мұнда ауа +40…+43 градусқа дейін қызады. Түркістан облысында күн +41 градусқа дейін ысуы ықтимал. Аптап ыстыққа байланысты бұл өңірлерде өрт қаупі өте жоғары деңгейде сақталады.
Алматыда күндіз ауа температурасы +35 градусқа дейін көтерілгенімен, кешке қарай жағдай өзгеруі мүмкін. Қалада қатты жаңбыр, найзағай, бұршақ және екпінді жел күтіледі.
Алакөл маңында желдің екпіні 23-28 м/с-қа дейін жетуі ықтимал. Астанада да күн ыстық болып, ауа температурасы +35 градусқа дейін көтеріледі.
Мамандар ыстық, құрғақ өсімдіктер мен қатты желдің қатар келуі өрт қаупін арттыратынын ескертеді. Алматы тұрғындарына кешкі уақыттағы ауа райының өзгерісін ескеріп, сапар мен серуенді алдын ала жоспарлау ұсынылады.