Астана қаласының тұрғыны түнгі ойын-сауық орындарының бірінде газ тапаншасын қолданып, келушіге оқ атқаны үшін 4 жыл 8 айға бас бостандығынан айырылды.
Прокуратура мәліметінше, оқиға кезінде сотталушы алкоголь ішіп, көңіл көтеретін газ пайдаланған. Кейін ол клубтағы келушілерге тиісіп, жанжал шығарған. Оның әрекетіне ескерту жасаған азаматқа жауап ретінде күдікті газ тапаншасын шығарып, кеуде тұсына екі рет оқ атқан.
Оқиғадан кейін ер адам оқиға орнынан қашып кеткен. Зардап шеккен азамат түрлі дене жарақатын алған.
Сот отырысында айыпталушы өз кінәсін толық мойындады. Сот оны газ қаруын қолдану арқылы жасалған бұзақылық бабымен кінәлі деп танып, 4 жыл 8 ай мерзімге бас бостандығынан айыру жазасын тағайындады.
