Ерекше жобаға Массачусетс штатынан Кевин Акато мен Флоридадан Остин Франклин таңдалды. Олар FOX One телеарнасы ұйымдастырған байқауда жеңіске жетіп, әлем чемпионатының «бас бақылаушылары» атанды. Жоба шарты бойынша қатысушылар турнирдегі әрбір матчтың әрбір минутын тамашалап, әлеуметтік желілерде тұрақты түрде материалдар жариялауы керек. Егер осы талаптардың біреуі де орындалмаса, уәде етілген сыйақы төленбейді.
«Мен осы мүмкіндік үшін мейрамханадағы жұмысымнан кеттім. Бірақ бастығым қажет болса, кез келген уақытта қайта келуіме болатынын айтты», – дейді Кевин Акато BILD басылымына.
Ал Остин Франклин бұл жобаға қатысу үшін алты аптаға сүйіктісімен уақытша қоштасып, өзін толықтай футбол марафонына арнаған.
Турнирдің финалына дейін қатысушылар Нью-Йорктегі әйгілі Таймс-сквер алаңына орнатылған ауданы 36 шаршы метр болатын мөлдір шыны бокста уақыттарының басым бөлігін өткізеді. Күн сайын мыңдаған адам олардың ерекше жұмысын сырттан бақылап тұрады.
Эксперимент барысында бір-бірін бұрын танымайтын екі қатысушы жақын досқа айналған. Тамақ оларға тікелей шыны боксқа жеткізіледі, ал дәретхана бұрышта орналасқан. Дегенмен олар Таймс-скверде түнеп қалмайды – екеуі де жақын маңдағы қонақүйде тұрады.
