Қасқырдан қорғанудың жаңа тәсілі: Австрияда брондалған қойлар пайда болды
Аустриялық фермер Рудольф Шаубах қойларды қасқырлардан қорғауға арналған арнайы «сауыт» ойлап тапты. Ол мұндай қорғаныс құралын жасауға Австрия мен көршілес Германияда үй жануарларына қасқырлардың шабуылы жиілегеннен кейін кіріскен,— деп хабарлайды newsroom.kz
Өнертапқыштың айтуынша, бұл жаңалықты әзірлеуге шамамен үш жыл уақыт кеткен.
Жобаға сәйкес, шығыңқы тікенектері бар жеңіл пластик тор қойлардың қозғалысына кедергі келтірмеуі тиіс. Өнертапқыш қасқыр қойды қапқанда ауырсыну сезімін сезінсе, оған қайта шабуыл жасауға тырыспайды деп есептейді.
Алайда басылым мәліметінше, көптеген фермерлер бұл өнертабысқа күмәнмен қараған. Атап айтқанда, шаруашылық иелері мұндай қорғаныстың тиімділігіне сенбейді. Олардың пікірінше, пластик тор уақыт өте келе қойдың жүніне шатасып қалуы мүмкін, ал қасқырлар оған бейімделіп, жануардың қорғалмаған дене бөліктерінен тістеуді үйренуі ықтимал.