Вакцина да, ем де жоқ: Эбола таралуына байланысты 11 елге кіру ережелері қатаңдатылды
Дүниежүзілік денсаулық сақтау ұйымының (ДДСҰ) басшысы Конгода қайта жанданған әскери қақтығыстар Эболаға қарсы күресті қиындатып отырғанын мәлімдеді. Шығыс Конгодағы жағдай күрт шиеленіскен,— деп хабарлайды newsroom.kz
Reuters агенттігінің хабарлауынша, Бундибугйо деп аталатын Эбола вирусының штамынан туындаған індет Конго мен Угандада шамамен 220 адамның өліміне және 900-ге жуық жұқтыру жағдайына әкелген.
Өткен аптадағы мәлімет бойынша, ықтимал науқастармен байланыста болған 1261 адамның тек 7%-ы ғана анықталып, бақылауға алынған. Ал 27 мамырда ДДСҰ бұл сан 2000-нан асып кеткенін бағалады.
ДДСҰ бас директоры Тедрос Адханом Гебрейесус індеттің таралуы оған қарсы қабылданып жатқан шаралардан озып бара жатқанын айтты.
Оңтүстік Африканың жетекші эпидемиологы әрі Африка CDC ұйымының негізгі кеңесшілерінің бірі профессор Салим Абдул Карим бұл індеттің «аса жылдам қарқынмен» таралып жатқанын мәлімдеді.
«Қорытынды: вакцина жоқ. Ем жоқ. Вирус алты апта бойы байқалмай таралған. Шекарааралық жұғу расталды. Медициналық қызметкерлер қаза тауып жатыр. Қаржыландыру жеткіліксіз болған сайын індет те күшейіп барады», – делінген ДДСҰ-ның Африка бойынша жұмыс тобының презентациясында.
ДДСҰ басшысы сондай-ақ Конгодағы жағдайға қайта басталған әскери қақтығыстар кедергі келтіріп отырғанын атап өтті.
«Эбола таралуын тоқтату толықтай гуманитарлық қолжетімділікке байланысты… Бізге бейбіт тұрғындардың сенімінсіз және зардап шеккендерді оқшауламай бұл індетті жеңу мүмкін емес, ал ол үшін қауіпсіз орта қажет. Біз барлық тараптарды атысты дереу тоқтатуға шақырамыз. Бұл медициналық топтарға қауіпсіз және тұрақты жұмыс істеуге мүмкіндік береді. Адам өмірін бәрінен жоғары қоюды өтінеміз», – деп жазды Тедрос Адханом Гебрейесус X әлеуметтік желісінде.