Алматыда мәдениет және өнер қызметкерлері марапатталды
21 мамыр – Мәдениет және өнер қызметкерлері күніне орай Алматыда мәдениет және өнер саласы өкілдерін марапаттау рәсімі өтті. Іс-шара барысында қызметкерлерге мемлекеттік және ведомстволық марапаттар, ҚР Мәдениет және ақпарат министрінің Құрмет грамоталары, сондай-ақ Алматы әкімі Дархан Сатыбалдының атынан Алғыс хаттар табысталды,— деп хабарлайды newsroom.kz
Салтанатты жиында Алматы қаласы әкімінің орынбасары Абзал Нүкенов мәдениет саласы қызметкерлерін кәсіби мерекесімен құттықтап, бірқатар азаматқа мемлекеттік және ведомстволық марапаттарды табыстады.
Іс-шара барысында ол мәдениет пен өнер саласының қоғамның рухани дамуына зор үлес қосып келе жатқанын атап өтті.
«Сіздер сахнада да, сахна сыртында да қалам мен қылқалам, музыка мен би, театр мен кино арқылы қоғамның рухани жаңғыруына, ұлттық құндылықтарды дәріптеуге өлшеусіз еңбек сіңіріп келесіздер. Мәдениет саласының дамуына қосқан үлестеріңіз үшін шынайы алғыс білдіремін», – деді ол.
Атап айтқанда, Қазақстан Республикасы Президентінің Жарлығымен мәдениет саласындағы елеулі еңбегі және ел алдындағы айрықша қызметі үшін Ахмет Байтұрсынұлы музей-үйінің басшысы Райхан Сахыбекқызы Имаханбет «Құрмет» орденімен марапатталды. Сондай-ақ, «Алматы әуендері» шығармашылық бірлестігінің солисі Абзал Серғазыұлы Арықбаев «Ерен еңбегі үшін» медалімен марапатталды.
Мәдениет пен өнерді дамытуға қосқан зор үлесі үшін «Еңбек ардагері» медалімен келесі сала мамандары марапатталды:
• Ахмет Байтұрсынұлы музей-үйінің ғылыми қызметкері Шара Әбікенқызы Боздақова;
• Қазақ мемлекеттік циркінің цирк нөмірлерінің жетекшісі Құрманғали Мұқашұлы Досбатыров;
• «Дәуір» баспасының электромеханикалық цехының бастығы Жамал Камалұлы Момышов;
• «Атамұра» баспасының жетекші редакторы Ирина Федоровна Самойлюк;
• Мәдениет саласының ардагері Гүлнәр Құдабаева;
• «Мектеп» баспасының кітап сату және тарату бөлімінің маманы Мәрзия Түсіпжанқызы Манабова;
• Қазақстан Республикасының мәдениет қайраткері, әнші, термеші Бибажар Маханбетова.