Алматыда әлеуметтік қорғау саласында 29 мыңнан астам мемлекеттік қызмет көрсетілді
Алматы қаласында 2026 жылдың алғашқы үш айында әлеуметтік қорғау және зейнетақы саласы бойынша мемлекеттік қызмет көрсету қарқыны артты. Өңірлік коммуникациялар қызметінде өткен брифинг барысында жауапты департамент халыққа көрсетілген қызметтердің нәтижелері мен мүгедектікті сараптау бағытындағы негізгі көрсеткіштерді таныстырды.
21 сәуірде Алматы қаласының Өңірлік коммуникациялар қызметінде ҚР Еңбек және халықты әлеуметтік қорғау министрлігіне қарасты Әлеуметтік қорғау саласындағы реттеу және бақылау комитетінің қалалық департаменті 2026 жылдың бірінші тоқсанындағы жұмыс қорытындыларын жариялады. Брифингте департамент басшысы Мұрат Мұратбеков атқарылған жұмыстар мен әлеуметтік саладағы өзекті көрсеткіштерге тоқталды.
Есепті кезеңде департамент тарапынан 29 мыңнан астам мемлекеттік қызмет көрсетілген. Оның басым бөлігі зейнетақы мен әлеуметтік төлемдерге қатысты болса, қалған бөлігі мүгедектікті белгілеу және әлеуметтік қолдау шараларын рәсімдеуге бағытталған.
Мемлекеттік қызметтердің көпшілігі электрондық үкімет порталы мен «Азаматтарға арналған үкімет» корпорациясы арқылы онлайн форматта ұсынылған. Бұл өз кезегінде қызметтердің қолжетімділігі мен ашықтығын арттыруға мүмкіндік беріп отыр.
Ең көп сұранысқа ие қызметтердің қатарында бала тууына және бір жасқа дейінгі күтімге байланысты жәрдемақыларды рәсімдеу, мүгедектікті белгілеу, сондай-ақ базалық және жасына байланысты зейнетақы төлемдерін тағайындау болды.
Медициналық-әлеуметтік сараптама саласында да оң өзгерістер байқалады. Алғаш рет мүгедектік алу үшін өтініш берген азаматтардың басым көпшілігіне тиісті мәртебе тағайындалған. Ересектер арасында мүгедектікке әкелетін негізгі себептердің қатарында онкологиялық аурулар, қан айналымы жүйесінің сырқаттары және психикалық бұзылыстар бар. Ал балалар арасында психикалық дерттер мен туа біткен ақаулар жиі кездеседі.
Қайта куәландыру нәтижесінде кей азаматтардың денсаулығы жақсарып, толық немесе ішінара оңалу көрсеткіштері тіркелген. Сонымен қатар, сырттай проактивті қызмет көрсету үлесі артып, көптеген шешім азаматтардың тікелей қатысуынсыз қабылданған.
Мүгедектігі бар азаматтардың құқықтарын қорғау мақсатында оңалту құралдарын ұсыну, әлеуметтік қызметтердің сапасын бақылау және инфрақұрылым нысандарының қолжетімділігін тексеру бағытында да жұмыстар жалғасуда. Тексеру барысында бірқатар заңбұзушылықтар анықталып, әкімшілік шаралар қолданылған.
Департамент мәліметінше, тұрғындардан түскен барлық өтініштер белгіленген мерзімде қаралған. Алдағы уақытта әлеуметтік қызметтердің сапасын арттыру және халық үшін қолжетімділікті күшейту жұмыстары жалғаса береді.