Елорда

Астанадағы саммит: қандай жолдар жабылады және қалай дайындалу керек

Жасмина Нурлан

22–24 сәуір аралығында елордада халықаралық экологиялық саммит өтеді. Осы күндері Астананың бірқатар негізгі көшелерінде уақытша қозғалыс шектеулері енгізіледі. Қай жерде және қай уақытта жолдар жабылуы мүмкін — төменде толық ақпарат.

22–24 сәуір күндері Астана қаласында ірі экологиялық саммит өтеді. Іс-шараға халықаралық делегациялар қатысатындықтан, қауіпсіздік шараларына байланысты қала көшелерінде уақытша қозғалыс шектеулері енгізіледі.

Саммиттің негізгі өтетін орындары — EXPO және Конгресс орталығы мен Hilton Astana маңы. Сондықтан дәл осы аудандарда көлік қозғалысы жиі қиындайды.

22 сәуір (ашылу күні)

Таңғы 08:00–11:00 аралығында әуежайдан EXPO бағытына, соның ішінде Қабанбай батыр даңғылында қозғалыс шектеледі.

10:00–13:00 аралығында Мәңгілік Ел даңғылы мен EXPO маңында жолдар толық немесе жартылай жабылады.

12:00–14:00 аралығында Сығанақ және Түркістан көшелерінде шектеулер енгізіледі.

Кешкі 17:00–19:30 аралығында EXPO-дан қонақ үйлерге баратын бағыттар уақытша жабылады.

23 сәуір (ең қызу күн)

07:30–10:00 аралығында Қабанбай батыр даңғылы мен EXPO кіреберістерінде қозғалыс шектеледі.

10:00–13:00 аралығында Мәңгілік Ел даңғылы үзіліспен жабылып тұрады.

13:00–15:00 аралығында Сығанақ, Орынбор және Достық көшелерінде қозғалыс қиындайды.

17:00–20:00 аралығында кешкі іс-шараларға байланысты қосымша шектеулер енгізіліп, Ақорда маңы да жабылуы мүмкін.

24 сәуір (жабылу күні)

08:00–10:00 аралығында EXPO кіреберіс жолдары жабылады.

12:00–16:00 аралығында Мәңгілік Ел даңғылы маңында шектеулер болады.

15:00–19:00 аралығында әуежай бағыты ерекше бақылауда болып, Қабанбай батыр даңғылы жиі жабылады.

Ең күрделі аймақтар

Үш күн бойы келесі көшелерде қозғалыс қиындайды:

  • Мәңгілік Ел
  • Қабанбай батыр
  • Сығанақ
  • Түркістан
  • Орынбор
  • Достық

Маңызды ақпарат

Жолдардың жабылуы көбіне уақытша болады — шамамен 10–30 минутқа, кортеждер өткен кезде. Бірақ EXPO маңында шектеулер ұзаққа созылуы мүмкін. Кей жағдайларда жолдар алдын ала ескертусіз жабылады.

Ең қиын уақыт — таңғы 08:00–10:00 және кешкі 17:00–20:00 аралығы. Қала тұрғындарына бағыттарын алдын ала жоспарлап, балама жолдарды қарастыру ұсынылады.