Қазақстанда ең қымбат балабақшалар қай қалаларда?

(ranking.kz дерегі).

Ең қымбат мектепке дейінгі қызметтер Алматы қаласында тіркелді: айына 38,2 мың теңге — бұл орташа көрсеткіштен 27%-ға жоғары. Екінші орында Астана қаласы тұр: 36 мың теңге (шамамен 20%-ға жоғары). Үшінші орынға Қостанай қаласы шықты: шамамен 36 мың теңге (орташа деңгейден 19,4%-ға жоғары). Сонымен қатар, бағасы жоғары қалалар қатарында Өскемен (35,7 мың теңге) және Павлодар (33,1 мың теңге) бар.

Ең төмен баға Түркістан қаласында байқалды: бар болғаны 12,7 мың теңге — бұл, мысалы, Алматымен салыстырғанда 66,7%-ға арзан. Сондай-ақ салыстырмалы түрде төмен бағалар Таразда (19,3 мың теңге) және Қызылордада (19,4 мың теңге) тіркелген.

Айта кету керек, бұл деректер Қазақстан Республикасының Ұлттық статистика бюросының мектепке дейінгі мекемелер секторы бойынша ресми мәліметтері негізінде алынған. Ал жекеменшік балабақшалардың бағасы бұдан әлдеқайда жоғары екені белгілі — мұны кез келген ата-ана растай алады.

Сонымен қатар, басылым мектепке дейінгі қызметтер бағасының өзгеру динамикасын да қарастырды. Ұлттық статистика бюросы бұл сала бойынша арнайы баға индексін жарияламайтындықтан, өзгеріс өткен жылмен салыстырғандағы пайыздық айырмашылық арқылы есептелді. Мұнда да өңірлер арасында үлкен айырмашылық байқалады.

Жалпы ел бойынша 2026 жылдың ақпанында мектепке дейінгі қызметтердің орташа бағасы бір жылда 10%-ға өскен. Ең үлкен өсім Өскемен қаласында тіркелді — бірден 40%-ға. Сондай-ақ бағаның айтарлықтай өсуі мына қалаларда байқалды: Семейде — 33,2%, Қонаевта — 24,1%, Петропавлда — 19,1%, Талдықорғанда — 18,2%, Таразда — 18%.

Ал 20 ірі қаланың жетеуінде баға өсімі орташа деңгейден төмен болды. Тағы төрт қалада баға айтарлықтай өзгермеген. Қарағандыда керісінше, баға аздап төмендеп, 0,5%-ға арзандаған.