Мұнай бағасы қайтадан барреліне 100 доллардан асты
Мұнай экспортына қауіп төнуіне байланысты Таяу Шығыстағы жағдайдың шиеленісуі аясында мұнай бағасы жедел өсуде,— деп хабарлайды newsroom.kz
Әлемдік мұнай бағасы өсімін жалғастыруда. Brent маркалы мұнайдың құны сауда барысында барреліне 105,19 долларға дейін көтеріліп, шамамен 1,26%-ға қымбаттады. Бағаның өсуіне Таяу Шығыс елдерінен мұнай жеткізілімі үзілуі мүмкін деген алаңдаушылық әсер етуде.
Reuters агенттігінің мәліметінше, аймақтағы мұнай экспортына қатысты геосаяси тәуекелдерге байланысты нарық қайтадан қысымға ұшыраған.
TradingView платформасындағы сауда деректеріне сәйкес, алдыңғы жабылу бағасы барреліне 103,88 доллар болған. Ал күндізгі баға ауытқуы 102,04–106,50 доллар аралығында тіркелген.
Сарапшылардың айтуынша, Таяу Шығыстағы шиеленістің күшеюі дәстүрлі түрде мұнай нарығына әсер етеді. Себебі бұл аймақ әлемдегі ең ірі мұнай жеткізушілердің бірі болып саналады.