«Қазақтелеком» жаңа стратегияға көшті: байланыс операторынан ЖИ-инфрақұрылым провайдеріне

Компания Қазақстанда мемлекеттік органдарға, бизнеске және халықаралық технологиялық компанияларға ЖИ-жүйелерін бір терезе қағидаты бойынша орналастыруға, оқытуға және ауқымдауға мүмкіндік беретін толыққанды экожүйе қалыптастыруда. Осылайша, цифрлық инфрақұрылым саласында one-stop shop провайдері ретіндегі рөлін нығайтуды көздейді.

2025 жылғы негізгі жетістіктердің бірі – өңірдегі ең ірі GPU-кластер саналатын Al-Farabium суперкомпьютерінің іске қосылуы. Оның құрамында 400 NVIDIA H200 графикалық процессоры, 50 HGX сервері және алты петабайт жоғары өнімді деректер сақтау жүйесі жұмыс істейді. Кластер халықаралық TOP200 суперкомпьютерлер тізіміне енді және қазірдің өзінде терең оқыту, үлкен деректерді өңдеу және ЖИ-модельдерін әзірлеу міндеттерінде қолданылуда.

Сонымен қатар, компания Орталық Азиядағы ең ірі есептеу қуаттары кампусы – «Деректерді өңдеу орталықтары алқабы» стратегиялық жобасын іске асыруға кірісті. Павлодар облысының Екібастұз қаласында 400 гектардан астам аумақта бастапқы қуаты шамамен 300 мегаватт (МВт) болатын, кейін кезең-кезеңімен 1 гигаваттқа (ГВт) дейін кеңейту мүмкіндігі бар заманауи инфрақұрылым құрылуда. Бұл Қазақстанға жаһандық деректерді өңдеу хабтарының қатарына сенімді түрде қосылуға мүмкіндік береді.

Жоба әрқайсысының қуаты 50 МВт болатын 4 кезеңде ДӨО салуды, сондай-ақ Google, Amazon, Microsoft және Nvidia сияқты халықаралық hyperscaler және BigTech компанияларын тартуға арналған қуаты 100 МВт-қа дейінгі толық дайын Greenfield аймағын қамтиды.

Инфрақұрылым Tier III халықаралық стандарттарына сәйкес болады, ал энергия тиімділігі коэффициенті PUE 1.25 деңгейін құрайды. Hyperscale компаниялардың талаптарын ескере отырып, Еуропадағы трафик алмасу орталықтарына дейінгі желілік кідірісті барынша азайту жұмыстары басталды. Жалпы, «ДӨО алқабы» жобасы ел экономикасына инвестиция тартып, жаңа жоғары білікті жұмыс орындарын құрып, өңірдің цифрлық трансформациясының локомотивіне айналады.