Орталық сайлау комиссиясы қолданыстағы заңнамаға сәйкес референдум тек дәстүрлі — офлайн форматта өтетінін мәлімдеді. Азаматтар дауыс беру үшін сайлау учаскесіне жеке келіп, бюллетень толтыруы тиіс. Бұл — дауыс беру құпиясын сақтаудың негізгі талабы.
Цифрлық даму бірінші вице-министрі Ростислав Коняшкиннің айтуынша, онлайн дауыс беру заң өзгерген жағдайда ғана мүмкін. Техникалық тұрғыдан мұндай жүйені әзірлеуге болады, бірақ әзірге ондай міндет қойылған жоқ.
ОСК төрағасы Нұрлан Әбдіров электронды дауыс беру әлемнің шамамен 40 елінде ғана қолданылатынын атап өтті. Оның айтуынша, қағаз бюллетеньмен дауыс беру шамамен он есе арзан. Сонымен қатар қоғамда бұл мәселеге қатысты ортақ пікір қалыптаспаған — көзқарастар теңдей бөлінген. Негізгі тәуекелдер қатарында киберқауіпсіздік пен дербес деректерді қорғау мәселесі аталады.
Комиссия өкілдері жаңа механизмдерді «жай енгізу үшін енгізу» жоспарланбағанын айтып, халықаралық тәжірибе зерделеніп жатқанын жеткізді.
