Жаңалықтар

Машкевичтің Қазақстандағы активтері Дубай компаниясына өтті ме? Мәміле жайлы не белгілі

Жанар Ғарифоллақызы

Қазақстандық бірқатар компаниялардағы марқұм миллиардер Александр Машкевичтің үлестері шетелдік Central Asian DMCC құрылымына өткен. Бұл туралы «Ручная экономика» арнасы хабарлады. Құрылтайшылардың ауысуы Машкевичке, Патох Шодиевке және Ибрагимовтар әулетіне тиесілі болған кемінде бес компанияда тіркелген.

Қандай компанияларда өзгеріс болды?

Күзде Central Asian DMCC «Еуразиялық өндірістік компанияның» құрылтайшылары қатарына кіріп, Машкевичтің орнын басты. Осы құрылым арқылы медицина, қонақүй бизнесі және жылжымайтын мүлікті жалға беру салаларындағы активтер бақыланады.

Ұқсас өзгерістер:

  • «Еуразиялық коллекторлық агенттік» ЖШС,
  • Advance KZ,
  • Kazakhstan Mineral Resources Corporation Investment
  • компанияларында да орын алған.

eGov пен есептіліктегі айырмашылық

eGov дерекқорында Машкевич әлі де «Еуразиялық өнеркәсіптік компанияның» акционері ретінде көрсетілген. Алайда қаржылық есептілікте ірі акционер ретінде Central Asian DMCC тіркелген.

Аталған құрылымға:

  • «Altair Air» компаниясы,
  • Боралдай әуежайы,
  • гольф-клуб «Жайляу»-ды басқаратын «Кокмайса» ЖШС-нің 52 % үлесі тиесілі.

Машкевичтің «Кокмайсадағы» үлесі де Дубай компаниясына өткен.

Central Asian DMCC деген кім?

Central Asian DMCC 2022 жылы Дубайда, бизнес жүргізудің арнайы режимі бар DMCC аймағында тіркелген. Қазақстандағы мекенжайы «Еуразиялық банктің» бас кеңсесінің адресімен сәйкес келеді.

Ақырғы бенефициарлар кім?

Жария деректерде Central Asian DMCC-нің түпкілікті иелері туралы тікелей ақпарат жоқ. Алайда жанама белгілер компанияның Машкевичтің мұрагерлерімен байланысы болуы мүмкін екенін көрсетеді.

Акционер ауысқаннан кейін марқұм кәсіпкердің жұбайы Лариса, сондай-ақ қыздары Анна мен Алланыңмәртебесі өзгерген. Қазір олар жеке немесе аффилирленген құрылымдармен бірге 10 % және одан жоғары дауыс беретін акцияларға иелік ететін тұлғалар ретінде көрсетілген.

Сонымен қатар Анна Машкевич акционерлік капиталмен байланысты компаниялардың бірінде лауазымды тұлға ретінде тіркелген.

Қалған активтердің тағдыры белгісіз

Александр Машкевич «Еуразиялық қаржы компаниясының» 33 % акциясына, сондай-ақ ERG құрамындағы үлеске Патох Шодиевпен, Ибрагимовтар әулетімен және Қазақстан үкіметімен бірге иелік еткен. Бұл активтердің болашақтағы тағдыры әзірге жарияланған жоқ.