Облыс әкімдерінің цифрландыру жөніндегі орынбасарлары тағайындалады
Қазақстанның әр өңірінде цифрландыруға жауапты облыс әкімдерінің орынбасарлары тағайындалуы мүмкін. Бұл туралы Jibek Joly арнасына берген сұхбатында Жасанды интеллект және цифрлық даму вице-министрі Досжан Мұсалиев мәлімдеді, деп хабарлайды newsroom.kz.
Оның айтуынша, қазір бұл бастаманы іске асыру тетіктері қаралып жатыр. Мақсат — цифрландыруды тек мемлекеттік қызметтермен шектемей, экономиканың барлық саласына жүйелі түрде енгізу.
Вице-министрдің сөзінше, бүгінде әр министрлікте цифрландыруға жауапты вице-министр бар. Енді осы тәжірибені өңірлік деңгейде де енгізу жоспарланып отыр.
«Цифрландыру мемлекеттік салада ғана емес, экономиканың барлық саласында қолданылуы тиіс. Сондықтан әр әкімдікте осы бағытқа жауапты орынбасар болғанын көздеп отырмыз», — деді Досжан Мұсалиев.