Астанада жүргізушісіз такси қызметі іске қосылады
Қазақстанда жүргізушісіз такси қызметін екі ірі оператор — inDrive және Yandex Qazaqstan ұсынбақшы. Қызметтің пилоттық жобасы 2026 жылы Астанада жүзеге асады. Бұл туралы Қазақстан Республикасы Жасанды интеллект және цифрлық даму министрлігі, Көлік министрлігі және Астана қаласының әкімдігі inDrive мен Yandex Qazaqstan компанияларымен меморандумға қол қойғанын мәлімдеді.
Астана 2026 жылы бұл қызметті іске қосатын алғашқы қала болып, қалалық мобильділіктің жаңа кезеңіне қадам басады. Бұл жобаның мақсаты — автономды көлікті «қауіпсіздік деңгейін арттыру, жайлылық пен қалалық ортаны жақсарту құралы» ретінде пайдалану. Жоба «ақылды қала» стратегиясы аясында жүзеге асырылып, оның алғашқы кезеңінде тестілеу, заңнамалық реттеу және инфрақұрылымды дайындау жоспарланған.
Халықаралық зерттеулерге сүйенсек, автономды көліктер адам факторын азайту арқылы жол-көлік оқиғаларын азайтуға, көлік ағынын тиімді басқаруға және қаладағы қолжетімділікті арттыруға мүмкіндік береді. Сонымен қатар, олар ірі қалалардың орнықты көлік жүйесінің маңызды бөлігіне айналмақ.
inDrive компаниясы жүргізушісіз такси пилоттық жобасы үшін Астана халықаралық әуежайы мен Abu Dhabi Plaza сауда орталығы арасындағы бағытты таңдады. Қызметті іске қоспас бұрын, қауіпсіздікті қамтамасыз ету үшін барлық қажетті дайындықтар мен тәуекелдер бағаланатын болады.
inDrive компаниясының Қазақстандағы жетекшісі Арай Бекембаев: «Астанада алғаш рет өздігінен жүретін таксилерді іске қосуда Көлік министрлігімен, Жасанды интеллект және цифрлық даму министрлігімен және Астана қаласының әкімдігімен бірлесіп жұмыс істейтінімізге қуаныштымыз. Біз серіктестеріміздің автономды басқару технологияларын inDrive-тың халықаралық платформасымен біріктіре отырып, пайдаланушыларға қауіпсіз әрі қолжетімді сапарлар ұсынуды көздейміз», — деді.
Yandex Qazaqstan басшысы Тимур Шәлекенов атап өткендей, компанияның автономды көлік жобасы кезең-кезеңмен іске қосылады. Пилоттық режимде жұмыс істей бастағаннан кейін сервистің сапасын тексеріп, жаңа мүмкіндіктер мен қауіпсіздік шаралары енгізіледі. Қала жағдайына сәйкес тестілеу жүргізіліп, көліктердің қауіпсіздігіне кепілдік беріледі.
inDrive компаниясы Сауд Арабиясында автономды мобильділік жобаларын іске қосқан тәжірибесін Қазақстандағы жобаға да енгізуді жоспарлап отыр. Жүргізушісіз такси қызметін inDrive мобильді қосымшасы арқылы тапсырыс беруге болады. Пилоттық жобаның нәтижелері оң болса, қызмет ауқымы кеңейіп, инфрақұрылым мен реттеуші тетіктердің талаптарына сай іске қосылады.
Жүргізушісіз такси қызметі іске қосылған елдер мен қалаларда жол қозғалысындағы қауіпсіздік деңгейі айтарлықтай артқан. Өндірушілердің айтуынша, мұндай өңірлерде жол-көлік оқиғалары 90 пайызға дейін азайған. Сонымен қатар, бұл жаңа технологиялар райд-хейлинг нарығындағы өзгерістерді қозғайды.