Қарағанды қаласында ер адам ас үйде шыққан өртті өздігінен сөндіруге тырысып, күйік жарақатын алды. Бұл туралы ҚР Төтенше жағдайлар министрлігі хабарлады.
Оқиға Жекібаев көшесіндегі бес қабатты тұрғын үйдің бір пәтерінде болған. Ас үйдегі тоңазытқыштың жанғыш бөлшектері өртеніп, жоғары температураның әсерінен ас үй жиһаздары зақымдалып, керме төбе еріген.
Өртті өз бетімен сөндіру кезінде 32 жастағы пәтер иесі күйік алып, ауруханаға жеткізілді.
«ТЖМ қызметкерлерінің жедел әрекетінің арқасында құтқару қалпақтарын қолдана отырып, төрт адам, оның ішінде екі бала қауіпсіз жерге эвакуацияланды», – деп мәлімдеді министрліктен.
Электр сымдарының қысқа тұйықталуынан шыққан өрт қысқа мерзімде сөндірілді.
