2026 жылы баспана қол жетпес арманға айнала ма? Бағаның өсуіне не түрткі
Қазақстанда жаңа салынған үйлердің бағасы алдағы қысқа мерзімде айтарлықтай өзгермеуі мүмкін. Алайда 2026 жылға қарай нарықта қымбаттау үрдісі анық сезіледі деген болжам бар. Мұндай тұжырымды AERC сарапшылары тұрғын үй нарығына арналған шолуында келтірген.
Сарапшылардың айтуынша, келесі жылы баға бірден шарықтамайды, бірақ ай сайынғы ұсақ ауытқулармен бірге жалпы өсім бағыты сақталады. Бұған бірнеше негізгі фактор әсер етпек:
Құрылыс кодексінің қатаюы. Әсіресе үлестік құрылысқа қойылатын талаптардың күшеюі девелоперлердің шығынын арттырады;
Зейнетақы жинақтарының әсері. Азаматтардың тұрғын үй жағдайын жақсарту үшін зейнетақы қаражатын пайдалану мүмкіндігінің кеңеюі сұранысты күшейтеді;
ҚҚС өсімі. Қосылған құн салығының жоғарылауы құрылыс материалдары мен қызметтердің өзіндік құнын қымбаттатады.
Осы факторлардың жиынтығы инфляциялық қысымды күшейтіп, 2026 жылы жаңа баспананың айтарлықтай қымбаттау қаупін арттырады. Сарапшылар әлеуетті сатып алушыларға нарықтағы өзгерістерді қазірден бақылап, шешімді созбауға кеңес береді.