Қазақстанда шетелдік студенттер саны 35 мыңнан асты
Қазақстан соңғы жылдары Еуразиядағы ірі білім беру хабы ретінде беделін жүйелі түрде нығайтып келеді. 2025 оқу жылында елдегі жоғары оқу орындарында 88 елден келген 35 075 шетелдік студент білім алуда, деп хабарлайды newsroom.kz ҚР ғылым және жоғары білім министрлігіне сілтеме жасап.
Бұл – жоғары білімді интернационалдандыру қарқынының өсіп келе жатқанын және отандық ЖОО-лардың бәсекеге қабілеттілігін көрсететін маңызды көрсеткіш.
Өткен жылмен салыстырғанда халықаралық студенттер легінің 11%-ға артуы Қазақстанның сапалы білім беруді, халықаралық академиялық ортаны және кәсіби дамуға қолайлы жағдай жасайтын толыққанды білім беру орталығын қалыптастырып жатқанын дәлелдейді.
Студенттер географиясының кеңеюі де айқын байқалады. Қазақстанда білім алып жүргендер арасында төмендегі елдер көш бастап тұр:
🔹 Үндістан – 9 959
🔹 Түрікменстан – 9 089
🔹 Өзбекстан – 4 136
🔹 Қытай – 3 367
🔹 Ресей – 2 426
Оңтүстік және Орталық Азия елдерінен, сондай-ақ Қытайдан келетін студенттердің айтарлықтай үлесі медициналық, инженерлік, IT және әлеуметтік-экономикалық бағыттар бойынша қазақстандық бағдарламаларға сұраныстың тұрақты екенін көрсетеді.
Қазақстанды таңдаудың негізгі факторлары:
🔹 салыстырмалы түрде қолжетімді оқу ақысы;
🔹 қазақстандық дипломдардың танылуы және халықаралық серіктестік желілері;
🔹 инфрақұрылымның жаңаруы және тәжірибеге бағытталған оқытудың кеңеюі.
Шетелдік студенттерді ең көп тартатын үш мегаполис:
🔹 Алматы – 18 195
🔹 Астана – 4 292
🔹 Шымкент – 3 645
Алматы – ұлттық университеттер, медициналық ЖОО-лар мен жекеменшік білім беру ұйымдары шоғырланған Орталық Азиядағы ең ірі білім беру экожүйесі. Астана – ғылыми орталықтары мен халықаралық білім жобалары арқылы интеллектуалды хаб ретінде дамып келеді. Шымкент – еліміздің оңтүстігіндегі индустриялық-білім беру орталығына айналуда.
Бұл үш қала жиынтық түрде Қазақстанның Ташкент, Бішкек және Баку сияқты өңірлік орталықтармен бәсекелесе алатын деңгейге жеткенін көрсетеді.
Шетелдік студенттерді қабылдаудағы жетекші ЖОО-лар:
Әл-Фараби атындағы ҚазҰУ – 4 497
С. Асфендияров атындағы ҚазҰМУ – 2 687
Л. Гумилев атындағы ЕҰУ – 2 483
Қ. Сәтбаев атындағы ҚазҰТЗУ – 1 759
М. Әуезов атындағы ОҚМУ – 1 730
Ұлттық университеттерде халықаралық студенттердің көптеп шоғырлануы бағдарламалар сапасына сенімнің artқанын, ғылыми инфрақұрылымның жақсарып, бірлескен жобалар мен халықаралық әріптестіктің кеңейгенін айғақтайды.
Білім беру салалары бойынша сұраныс құрылымы:
🔹 Денсаулық сақтау және медицина – 12 950
🔹 Педагогика – 5 943
🔹 Бизнес және құқық – 4 539
🔹 Инженерия – 3 374
🔹 Ақпараттық технологиялар – 2 141
Бұл деректер техникалық, медициналық және IT бағыттарына жаһандық сұраныстың артып келе жатқанын, ал Қазақстанның Орталық және Оңтүстік Азия үшін кадрлар даярлауда маңызды рөл атқарып отырғанын көрсетеді.
Жоғары білім беру саласында жүргізіліп жатқан реформалар – жетекші шетелдік университеттердің филиалдарын ашу, ғылыми кластерлерді дамыту, білім стандарттарын жаңарту және халықаралық академиялық желілерді кеңейту – Қазақстанның білім беру экспортын тұрақты түрде өсіріп отыр.
Жалпы алғанда, еліміз тек Орталық Азиядағы ірі білім беру орталығы ретінде ғана емес, өңірлік кадрлар даярлау процестеріне ықпал ететін жеке білім беру хабын қалыптастыру жолында сенімді қадам жасап келеді. Министрлік ашықтық, интернационалдандыру және жаһандық академиялық кеңістікке интеграция саясатын жалғастыруға ниетті.