Не болды?
Оқиға видеосы қысқа уақыт ішінде әлеуметтік желілерде тарап кетті. Кадрдан балалар бір-біріне бір нәрсе лақтырып тұрғаны байқалады. Сол сәтте кадрға ірі денелі ер адам жүгіріп келіп, балалардың бірін қатиы соққымен теуіп кеп жібереді. Бала жерге құлайды, ал ер адам оқиға орнынан кетіп қалады. Камерада баланың орнынан тұруға тырысқаны, бірақ тұра алмағаны да көрінеді.
Полиция не дейді?
Бұл жағдай бойынша пікір алу үшін Алматы қалалық полиция департаментінің баспасөз қызметіне жүгіндік.
"Әлеуметтік желілерде ер адамның тұрғын үй кешенінің ауласында кішкентай баланы ұрып-соғып жатқан видеосы тарап жатыр. Аталған дерек бойынша Алатау аудандық полиция басқармасы қылмыстық іс қозғады. Күдікті ұсталып, уақытша ұстау изоляторына қамалды", — деді полиция өкілдері.
Қазіргі уақытта оқиғаның барлық мән-жайы анықталып жатыр. Тергеу барысы қалалық полиция департаменті басшылығының бақылауында.
