«Роскосмос» ұшыру кезінде апат болғанын растады. Ресми деректерге сүйенсек, тасымалдаушы зымыран қозғалған кезде жылжымалы қызмет көрсету кабинасын жұлып кеткен. Құрылғы шамамен 20 метр жерге құлап, қатты бүлінген.
Ресей ғарышкерлік федерациясының мүшесі Александр Хохлов бұл жағдайды өте күрделі деп бағалайды. Оның айтуынша, зақымданған тұғырды қалпына келтіру оңай емес.
"Мұндай құрылғылар бұрын Украинадағы Краматорск қаласында жасалатын. Енді Ресейге барлық элементті басынан бастап өз ішінде құрастыруға тура келеді. Бұл – ұзақ әрі қымбат процесс», – дейді сарапшы.
Хохлов балама нұсқа да бар екенін айтады. Бір кездері Қазақстанға музейлік экспонат ретінде берілген Гагарин старт алаңының қызмет көрсету кабинасын уақытша пайдалану мүмкіндігі қарастырылуы мүмкін.
«Кабина жақсы сақталған. Егер Ресей Қазақстанмен келісімге келсе, оны орнату аса көп уақыт алмайды. Дегенмен бұл жұмыстың өзі 2026 жылдың жазына дейін созылуы ықтимал», – деп атап өтті ол.
Сарапшы Георгий Тишкин де жағдайдың күрделі екенін растайды. Оның айтуынша, нақты қай бөлшектер бүлінгені толық анықталмағандықтан, жөндеу мерзімі одан да ұзақ болуы мүмкін.
«Алдын ала болжамдар бар, бірақ нақты тексеріссіз мерзімді айта қою қиын. Жөндеу бір жарым жылдан екі жылға дейін созылуы ықтимал», – дейді маман.
Старт кешенінің істен шығуы Халықаралық ғарыш станциясының (ХҒС) жоспарлы миссияларына айтарлықтай әсер етіп отыр. Бұған дейін экипажды ауыстыру және станцияға жүк жеткізу міндетін Ресей атқарып келген. Енді бұл үшін АҚШ-пен келіссөз жүргізуге тура келеді. Бұл қызмет ақылы болады.
Сонымен қатар орбитаны түзету жұмыстары да қиындық туғызады. Әдетте станция орбитасын ресейлік «Прогресс» кемесі реттейді. Егер ол уақытша қолжетімсіз болса, бұл міндетті америкалық Crew Dragon орындайды.
Ал жаңа экипаж уақытында ұша алмаған жағдайда, ХҒС-қа екі күн бұрын «Союз МС-28» кемесімен барған үш ғарышкер станцияда жоспарланған мерзімнен ұзағырақ қалуы мүмкін.