«Екі түрлі баға»: Халықты алдаған сатушы жауапқа тартылды
Ақтауда өткен жәрмеңкелердің бірінде сатушы төлем тәсіліне қарай тауарға екі түрлі баға қойғаны үшін жауапқа тартылды. Қала тұрғындары бұл туралы әлеуметтік желіде жазып, мәселені қала әкімдігі арқылы Маңғыстау облысының Сауда және тұтынушылардың құқықтарын қорғау департаментіне жолдады.
Тексеру барысында йогурттың қолма-қол ақшаға 100 теңге, ал банк картасымен 120 теңге болып сатылғаны анықталды. Соның нәтижесінде кәсіпкер ҚР ӘҚБтК-нің 193-бабы 4-бөлігі бойынша әкімшілік жауапкершілікке тартылып, 11 796 теңге көлемінде айыппұл салынды,-деп хабарлайды Newsroom.kz тілшісі Lada.kz сайтына сілтеме жасап.
Ведомство өкілдері карта арқылы төлем жасағанда бағаның жоғары болуы тұтынушы құқығын бұзу екенін және сатып алушыға қысым көрсету ретінде бағаланатынын атап өтті. Сондай-ақ жәрмеңке ұйымдастырушылары мен сатушылар арасында заң талаптарын түсіндіру жұмыстары күшейтілетіні айтылды.