Алматыдағы Түрксіб ауданы тұрақты дамуда
Түрксіб ауданында 2025 жылы «Халық қатысатын бюджет» бағдарламасы аясында қоғамдық кеңістіктерді жаңарту бойынша 32 жоба сәтті жүзеге асырылды. Бұл туралы Өңірлік коммуникациялар қызметінде аудан әкімі Бақытжан Ақжаров хабарлады.
Биылғы жылы ауданда келесі өзгерістер орын алды:
- 7 жаңа заманауи алаңқай ашылды;
- 6 жаяу жүргіншілер аймағы жаңғыртылды;
- 6 аула толықтай абаттандырылды;
- 6 жерге автоматты суару жүйесі орнатылды;
- 3 балалар мен спорт алаңы пайдалануға берілді;
- 4 жаңа сыртқы жарықтандыру желісі қосылды.
Әкімнің айтуынша, тұрғындардың белсенді қатысуы ауданның дамуына қолдау көрсетіп отыр. Қазіргі таңда 2026 жылға 359 өтініш түскен, бұл турксібтіктердің бағдарламаға деген сенімінің артып, қоғамдық жобаларға қызығушылық танытып отырғанын көрсетеді.
