Мысыр Гизада 20 жыл бойы салынған Ұлы музейді ашты
Мысырда әлемдегі ең ірі мәдени нысандардың бірі саналатын Ұлы мысыр музейі (Grand Egyptian Museum) ресми түрде ашылды. Гиза қаласында орналасқан ғимараттың құрылысы 20 жылға созылып, жоба құны 1,2 миллиард долларды құрады, деп хабарлайды newsroom.kz.
Жобаға шамамен 1,2 миллиард доллар жұмсалған. Құрылыс жұмыстары 2005 жылы басталып, түрлі себептермен бірнеше рет кейінге шегерілген болатын. Енді көп жылдық еңбектің нәтижесінде әлем туристері мен тарих әуесқойлары үшін жаңа мәдени орталық есігін айқара ашты.
Музейдің аумағы 500 мың шаршы метрден асады. Мұнда 100 мыңнан астам жәдігер қойылған. Солардың ішінде Хуфу перғауынының 4500 жылдық жерлеу қайығы, сондай-ақ Тутанхамонның қабірінен табылған 5 мыңнан астам қазына бұйымы бар.
Архитектуралық тұрғыдан ғимарат Гиза пирамидаларының бағытына дәл қаратып салынған. Оның алдыңғы беті мөлдір әйнек пен тас материалдардан жасалған, бұл ежелгі мен заманауиді үйлестірудің символы ретінде қарастырылады.
Музей ішінде интерактивті аймақтар, балаларға арналған білім беру орталығы және ежелгі артефактілерді қалпына келтіру зертханасы бар. Сарапшылардың пікірінше, бұл жоба Мысыр туризмін жаңа деңгейге көтеріп, елдің мәдени мұрасын әлемге кеңінен танытады.