Президент ұсынған «Әділетті Қазақстан» тұжырымдамасы — реформалардың өзегіне айналған идея. Оның мәні – әділдік пен ашықтықты орнату, заң үстемдігін қамтамасыз ету, азаматтың мемлекет алдындағы емес, мемлекеттің азамат алдындағы жауапкершілігін арттыру. Бұл саясаттың түпкі мақсаты — барлығына тең мүмкіндік ұсыну арқылы қоғамдағы әлеуметтік және саяси әділетсіздікті азайту.
Қоғам қайраткері Әнес Бисенұлы атап өткендей, әділетті қоғамда шенеунік те, қарапайым азамат та заң алдында тең.
«Егер заң баршаға ортақ болса, сонда ғана халық билікке сенеді. Біздің реформалардың мәні де осында», – дейді ол.
Бүгінде әділдік қағидаты мемлекеттік басқарудың барлық деңгейінде көрініс табуда. Сот реформасы, жергілікті өзін-өзі басқару жүйесінің кеңеюі, бюджеттің ашықтығы — осы бағыттағы нақты нәтижелер. Мемлекеттік қызметтің тиімділігін арттыру мен сыбайлас жемқорлыққа қарсы жүйелі күрес те қоғамның сенімін нығайтып отыр.