Халық зейнетақы қаржысын көз еміне жұмсай бастады
Қазақстандықтар зейнетақы жинағын стоматологиялық емнен гөрі көз емдеуге көбірек жұмсай бастаған.
2025 жылдың қыркүйегінде офтальмологиялық қызметтерді төлеу үшін 1,4 млрд теңгеге 1611 өтінім орындалған. Бұл — тамызбен салыстырғанда саны бойынша 5,8 есе, ал сома жағынан 7 есе артық көрсеткіш. Соңғы бір жылдағы орташа деңгеймен салыстырғанда да өсім рекордтық – тиісінше 7,9 және 9,3 есе жоғары.
Неліктен көз еміне сұраныс артты?
Мұндай өзгеріске «Отбасы банкінің» қыркүйектегі шешімі әсер етті. 15 қыркүйектен бастап банк тіс емдеуге арналған өтінімдерді қабылдауды тоқтатты. Себебі бұл бағытта көптеген жалған өтінімдер мен заңсыз схемалар анықталған.
Көктемде енгізілген қосымша бақылау да нәтиже бермеген соң, Денсаулық сақтау министрлігі стоматологиялық қызметтерді зейнетақы қаражаты есебінен төлеу нормасын алып тастау жөнінде түзетулер әзірледі. Қазір кей күдіктілерге қатысты тергеу амалдары жүріп жатыр.
«Тіс» бағытындағы ақшалар қайтарылуда
Қыркүйек айында зейнетақы жинағын пайдалануға берілген өтінімдер көлемі сәл төмендегенімен (4–6%), БЖЗҚ-ға кері қайтарылған қаражат көлемі күрт артқан.
Бір ай ішінде 21,8 млрд теңге (27,3 мың өтінім) кері қайтқан. Ал тамызда бұл көрсеткіш небәрі 3,7 млрд теңге (6,3 мың өтінім) болған. Бұл жағдай көптеген өтінімнің мақсатына сай болмағанын немесе жалған түрде берілгенін көрсетеді.
Көз емі мен баспана бағыты – тұрақты өсімде
Офтальмологиялық қызметке қатысты кері қайтқан өтінімдер аз – бар болғаны 83 өтінім (48 млн теңге). Бұл бағыт әзірге тұрақты.
Ал баспана алу мақсатындағы өтінімдер, керісінше, айтарлықтай артқан: 128,9 мың өтінім орындалып, 73,3 млрд теңге аударылған. Бұл – тамыз айымен салыстырғанда 20% жоғары көрсеткіш.