Марқұмдардың туыстарының айтуынша, ол 2018 жылы Gelandewagen көлігімен төрт адам отырған жеңіл автокөлікті соққан. Қатты соқтығыстың салдарынан үш адам – жүргізуші, қыздың анасы мен тәтесі қаза тапқан. Тағы бір жолаушы өмір бойына мүгедек болып қалған.
Қаза болғандардың балалары – Жанар мен Темірлан Хасеновтар сотталған адамның қалайша бостандықта жүргенін түсінбей, әділет іздеуде.
Ал Қылмыстық-атқару жүйесі комитеті бұл жағдайға қатысты түсініктеме берді. Ресми ақпаратқа сәйкес, Ілияс Кар жазасын қауіпсіздігі төмен түзету мекемесінде өтеп жатыр. Мұндай мекемелерде сотталғандарға белгілі бір жағдайда колониядан тыс жерге шығуға рұқсат етіледі.
«Ол жеке өтініші негізінде уақытша колониядан тыс жерде болған. Демалыс кезінде ешқандай заң бұзған жоқ, белгіленген мерзімнен соң қайтадан Тараздағы түзету мекемесіне оралды», – деп хабарлады комитеттен.
