Мұнайлы астанада жаңа ІТ-платформа таныстырылымы өтті (+ФОТО)

С.Өтебаев атындағы Атырау мұнай және газ университеті білім беру ісін цифрландыру бағытын белсенді түрде дамытуды жалғастыруда. Осы үдерістегі маңызды кезеңдердің бірі – оқу орнында жасанды интеллект технологияларын білім беру үдерісіне енгізуге арналған отандық Shai.Pro корпоративтік платформасының ресми таныстырылымы болды.

Shai.Pro платформасының таныстырылымы университет қабырғасында өтіп, студенттер, оқытушылар, IT-мамандар мен жоба өкілдерін жинады. Қазақстандық инженерлер әзірлеген бұл платформа – білім, ғылым және бизнес салаларындағы үдерістерді автоматтандырып,  өңдеуге қабілетті интеллектуалды экожүйе.

Shai.Pro өз мүмкіндіктері арқылы оқу үдерісін оңтайландырып қана қоймай, оқытушы мен студент арасындағы өзара байланысты нығайтып, жекелендірілген оқыту форматын дамытуға жол ашады.

Университеттің проректоры Нұркен Ахметов мұндай бастамалардың оқу орны дамуы үшін маңызы зор екенін атап өтті:

«Бүгін Shai.Pro компаниясы келіп, біздің студенттеріміз бен университетімізге өз платформасын таныстырды. Бұл жоба оқу үдерісін цифрландыру және жасанды интеллектіні білім саласына енгізуге бағытталған. Қазіргі таңда университетімізде цифрландыру мен жасанды интеллектті енгізу бойынша белсенді жұмыс жүргізілуде. Егер бұл бағдарламалық өнім студенттерге пайдалы болып жатса, біз оны қолдану мүмкіндігін қарастырамыз», – деді проректор.

Shai.Pro платформасы қазіргі таңда білім саласында инновациялық шешімдерді ілгерілетіп, тәжірибемен бөлісіп жүрген 50-ге жуық отандық IT-маманды біріктіреді. Жоба бұған дейін Қазақстанның үш жоғары оқу орнында таныстырылып, команда басқа оқу орындарымен де ынтымақтастықты кеңейтуді жоспарлап отыр.

Shai.Pro компаниясының менеджері Бексұлтан Аукенов команда жоспарымен бөлісті:

«Біз Атыраудағы университетпен бірлесіп жобаларды жүзеге асырғымыз келеді. Себебі, жасанды интеллект саласында мамандар әлі де аз. Біз оларды өзіміз дайындағымыз келеді. Қазір хакатон ұйымдастыру үстіндеміз. Біздің жобамыздың басты ерекшелігі – ол Қазақстанда жасалған. Жүйе ішкі қолданысқа арналған, ешқандай мәлімет шет елге жіберілмейді. Жоғары қауіпсіздік деңгейі қамтамасыз етілген».

Іс-шара соңында университет пен Shai.Pro командасы арасында болашақтағы ынтымақтастықтың негізгі бағыттары талқыланды. Ашық пікір алмасу мен сұрақ-жауап сессиясы арқылы студенттер мен оқытушылар жобаның мәнін,  артықшылықтары мен білім беру жүйесіне интеграциялау жолдарын тереңірек түсінді.