Назарбаевтың жиеніне тиесілі ғимарат неше млрд
Назарбаевтың жиеніне тиесілі болған компания құрылысының құны ондаған миллиардқа қымбаттады
Заңгер Бибек Жүнүсов Алматы облысындағы құрылыс жобасының күрт қымбаттауын көрсететін құжатты инстаграм парақшасында жариялады. Оның айтуынша, жоба құны 7,6 млрд теңгеден 28,1 млрд теңгеге дейінөскен.
Жүнүсов «бұның бәрі жұртқа белгілі, бірақ ешкім көрмегенсіп жүр» деп жазып, президент Қасым-Жомарт Тоқаевты да атап өтті.
Әңгіме — Алматы облысы құрылыс басқармасы мен «TOLAGAI-2050» ЖШС арасындағы мемлекеттік сатып алу келісіміне 2022 жылдың 5 қазанында жасалған қосымша келісім туралы. Құжатқа сәйкес, 2024 жылдың 5 тамызында жобаның құны 7,61 млрд теңгеден 28,13 млрд теңгеге көтерілген.
Айта кетсек, 2020 жылдың желтоқсанынан 2022 жылдың 14 ақпанына дейін «TOLAGAI-2050» компаниясының құрылтайшыларының қатарында қайтыс болған Болат Назарбаевтың қызы Ақбота Назарбаева да болған.
Бұған дейін бұл компания сот істеріне белшесінен батқан. Мысалы, ол 40 млрд теңгеге 15 шекара заставасын салу тендеріне қатысып, қаражаттың небәрі 35 пайызын ғана игеріп, мерзімді ұзартуды сұраған еді.