Жаңалықтар

Қарағанды дрон шығаратын болды

Қарағанды облысында үш түрлі ұшқышсыз ұшу аппаратының тәжірибелік үлгісі әзірленді. Бұл дрондар жол қозғалысын бақылау, жоғалған адамдарды іздеу, орман мен дала өртін дер кезінде анықтау және тағы да басқа көптеген бағытта қолданылуы мүмкін.

Жергілікті мамандар жасаған үлгілердің әрқайсысының өз ерекшелігі бар. Мәселен, ұзақ қашықтыққа ұшатын Vista-7 дроны кең аумақты шолуға, көлік пен адам іздеуге қолайлы. Ал ықшам әрі маневрлі Chimera-5 ғимарат ішінде, үйінді астында немесе қолжетімсіз жерлерде жұмыс істей алады. Ол әсіресе төтенше жағдайларда және полицияның қауіпті операцияларында тиімді құрал болмақ. Үшінші модель — көпмақсатты Apex-7. Ол көшені патрульдеуге, бұқаралық іс-шараларды бақылауға және өрт қауіпсіздігін қадағалауға бейімделген.

Жобаны жүзеге асырған «Перспектива» ғылыми-өндірістік бірлестігі шетелдік электрониканы Қазақстанда жасалған корпустармен үйлестіріп отыр. «Біз рамаларды өзіміз шығарамыз. Құны арзан әрі қажет болса қайта қолдануға болады. Мысалы, дайын дрондар нарықта шамамен 12 млн теңге тұрса, біз әзірлеген үлгілер әлдеқайда қолжетімді. Корпустарды 3D-принтермен басып шығарамыз. Егер дрон бүлінсе, бар болғаны 20 минутта жаңа корпус жасап, электрониканы соған орнатып, қайта ұшыруға болады», — дейді жобаның жетекшісі Максим Ким.

Оның айтуынша, мұндай дрондарды қолдану экономикалық жағынан да тиімді. Мысалы, тас жолдарға камера орнату қымбатқа түссе, дрондар арқылы жылдамдық режимін бақылап, заң бұзушылықтарға жедел әрекет ету әлдеқайда арзан. Сол сияқты мұнай құбырларын тексеруде де дрондар заңсыз қосылу мен жанармай ұрлығының алдын алуға көмектеседі.

Қазір кәсіпорын дрондарды жаппай өндіруді қолға алуды жоспарлап отыр.

Айта кетейік, бұған дейін осы бірлестік «Аргус-жаяу жүргінші» жүйесін жасаған еді. Арнайы камералар арқылы жаяу жүргіншіні «зебрада» өткізбеу деректерін тіркейтін бұл жоба Қарағандыда өз тиімділігін көрсетті: бір жыл ішінде жаяу жүргіншіні көлік қағу оқиғасы болмаған. Енді аталған жүйені еліміздің басқа қалаларына орнату көзделіп отыр.