БҰҰ: Әйелдердің білім алуына және жұмыс істеуіне тыйым салу Ауғанстан экономикасын тежейді
Ауғанстанда әйелдер мен қыздардың шамамен оннан сегізі білім алуға, жұмыс істеуге немесе мамандық игеруге мүмкіндіктен айырылған. Ұйымның мәліметінше, әрбір қыздың орта мектепті аяқтай алмауы елдің ЖІӨ-сін жыл сайын 2,5%- ға азайтады,- деп хабарлайды newsroom.kz
БҰҰ есебі бойынша, «Талибан» қозғалысы билікке келген төрт жылда Ауғанстан экономикасы әлеуетті өсімнің шамамен 10 %-ынан айырылды — бұл тек тікелей шығындар.
БҰҰ дайындаған Ауғанстандағы гендерлік теңдік индексінде атап өтілгендей, 13 жастан асқан қыздарға білім алуға тыйым салу және әйелдердің медицина мен білім беру сияқты негізгі салаларда жұмыс істеуін шектеу — әлеуметтік жүйенің іргетасын шайқалтатын фактор. БҰҰ әйел-дәрігерлердің жетіспеушілігі ана өлімінің көбеюіне, медициналық көмектің сапасының төмендеуіне және ерте жүктіліктің артуына әкеліп отырғанын ескертеді. 2026 жылға арналған болжамға сәйкес, босану кезіндегі әйелдер өлімі 50 %-дан астамға өсуі, ал кәмелетке толмағандардың некесі шамамен бір жарым есе артуы мүмкін.
БҰҰ бағалауынша, әсіресе жастар қатты зардап шегуде: қыздар арасындағы жұмыссыздық деңгейі жігіттерге қарағанда төрт есе жоғары.