«Біреуді кінәлі етуге асықпау керек»: Бозымбаев – көлік вице-министрінің ұсталуына қатысты
Үкімет басшысының орынбасары Қанат Бозымбаевтан бұрынғы көлік вице-министрі Сатжан Аблалиевке қатысты коррупциялық іске байланысты пікір сұралды. Оның айтуынша, сот үкімі күшіне енбей тұрып, адамды кінәлі деп санауға болмайды.
— Егер кез келген мемлекеттік мекемеде жұмыс істейтін адам жемқорлық бойынша сотталып жатса, оның тікелей басшысы отставкаға кетуі керек. Бірақ бұл — тек сот шешімі заңды күшіне енген соң. Ал оған дейін біреуді кінәлі деуге болмайды, — деді вице-премьер журналистер сауалына жауап беріп.
Бозымбаев Аблалиевтің әзірге тек күдікті ретінде танылып отырғанын еске салды.
Ол сондай-ақ Қазақстанда вице-министрлер қалай тағайындалатынын түсіндірді:
— Кез келген вице-министр тиісті министрдің ұсынысымен тағайындалады. Министр ұсынады, кандидат арнайы тексеруден өтеді — бұл процесте ҰҚК мен Сыбайлас жемқорлыққа қарсы қызмет те қатысады (қазір бұл екеуі бірігіп жұмыс істейді).
Сосын олар Президент әкімшілігі мен басқа да құрылымдарда келісуден өтеді. Үкімет кеңсесінің өз тәртібі бар. Соңында үкімет қаулысымен тағайындалады, — деді Бозымбаев.
Айта кетейік, Сатжан Аблалиев ірі көлемде пара алды деген күдікке ілінді. Қазір істі ҰҚК жанындағы жаңа Антикор қызметі тергеп жатыр. Жуырда Аблалиев қызметінен босатылған.