Рәміздерге құрмет ел тұтастығын білдіреді

Қазақстан Республикасының заңнамасында мемлекеттік рәміздерді пайдалану тәртібі нақты белгіленген. «Қазақстан Республикасының Мемлекеттік рәміздері туралы» Конституциялық заң бұл құндылықтарды қорлауға жол бермейтін құқықтық тетіктерді көздейді. Мысалы, рәміздерді лайықсыз жерде қолдану, оларды қорлау немесе бұрмалау – әкімшілік немесе қылмыстық жауапкершілікке әкеледі. 

Дегенмен, тек құқықтық шектеулер арқылы емес, азаматтардың рәміздерге деген саналы көзқарасы арқылы құрмет мәдениетін қалыптастыру әлдеқайда маңызды. Бұл – әсіресе, жас ұрпақ арасында тәрбие берудің негізгі бағыттарының бірі болуы тиіс. Мектептерде арнайы ашық сабақтар, салтанатты сап түзеу, рәміздер күнін атап өту, спорттық және мәдени шараларда Ту көтеру дәстүрлері – осы тәрбиелік мақсатқа қызмет етеді.

Мемлекеттік рәміздерге деген құрмет елдің рухани тұтастығын бейнелейді. Әр азамат Туды көргенде – мақтаныш сезінсе, Әнұран шырқалғанда – жүрегі елжіресе, Елтаңбаға қарап – өзінің бірегейлігі мен болашағына сенсе, онда қоғамда жоғары деңгейдегі азаматтық жауапкершілік пен ұлттық сана қалыптасқанын айтуға болады.

Халықаралық жарыстарда немесе саяси форумдарда Қазақстанның туының көтерілуі – жеке жетістік емес, тұтас ұлттың жеңісі. Осындай сәттерде рәміздерге деген шынайы құрмет жүректен шығады. Сол құрметті сақтау – ұлт болып ұйысудың, тарихты бағалаудың және болашаққа сеніммен қараудың дәлелі.

Қазіргі ақпараттық қоғамда мемлекеттік рәміздерді құрметтеуге БАҚ пен әлеуметтік желілердің де рөлі зор. Олар рәміздер туралы ағартушылық материалдар, үлгілі мысалдар мен видеороликтер арқылы халық санасына әсер ете алады. Әсіресе, жастар арасында патриотизмді арттыру мақсатында заманауи тәсілдер – флешмобтар, челлендждер, деректі фильмдер арқылы рәміздердің маңызын насихаттау қажет.