Денсаулық сақтау саласында айтарлықтай жұмыстар атқарылды

Отандық медицинаны дамыту барысы қалай жүріп жатыр? Кедергілер мен кемшіліктерді жою үшін қандай жұмыстар жасалуда? Біз бұл сұрақтардың жауабын жас дәрігер Әлішер Талғатұлынан білген едік.

– Әлішер мырза, алдымен өзіңізді таныстырып өтсеңіз.

– Рахмет. Мен – Әлішер Талғатұлы, Атырау облысында дүниеге келдім. Нұр-Сұлтан қаласындағы медициналық университетті жалпы практика дәрігері мамандығы бойынша тәмамдадым. Қазір Атырау қаласындағы емханада қызмет етіп жүрмін. Мамандығымды үлкен жауапкершілікпен таңдадым, себебі адамдарға көмектесу – менің өмірлік ұстанымым.

– Қазіргі таңда еліміздің денсаулық сақтау саласында қандай оң өзгерістерді байқайсыз?

– Соңғы жылдары медицина саласында айтарлықтай жаңғырулар болып жатыр. Цифрландыру жүйесі енгізілуде, телемедицина, онлайн-консультациялар, емханалардағы кезек жүйесінің жеңілдеуі – бәрі халықтың қолайлы ем алуына мүмкіндік беруде. Жаңа жабдықтар мен аппараттар орнатылып жатыр. Әрине, бұл — ел үкіметінің, Денсаулық сақтау министрлігінің дұрыс бағыттағы жұмысы деп ойлаймын.

– Сіздің ойыңызша, жас дәрігерлерге не жетіспейді? Қандай қолдаулар қажет?

– Ең алдымен, тәжірибе мен сенім жетіспейді. Жас мамандар кейде білімді болса да, шешім қабылдауда сенімсіздік танытады. Бұл – уақыт өте келе қалыптасатын нәрсе. Ал қолдау жағынан, ауыл-аймақтарға барған дәрігерлерге арналған әлеуметтік пакет – баспана, жалақы, кәсіби даму мүмкіндіктері – әлі де күшейтілуі керек. Қазірдің өзінде "Дипломмен ауылға" сынды бағдарламалар бар, бірақ олардың аясын кеңейту қажет.

– Сіз жастармен жиі араласасыз ба? Өз қатарластарыңыздың денсаулыққа көзқарасы туралы не айтасыз?

– Иә, замандастарымның арасында медицинаға деген қызығушылық артып келеді. Бірақ, өкінішке қарай, денсаулыққа жауапкершілікпен қарау мәдениеті әлі де төмен. Тексерілмей жүре беру, дәрігерге кеш келу, өзін-өзі емдеу сынды әрекеттер жиі кездеседі. Бұл – тек жастардың ғана емес, жалпы қоғамның мәселесі. Сондықтан денсаулық сақтау саласында профилактикалық жұмыстарды күшейтуіміз қажет.

– Дәрігер болу – тек мамандық қана емес, миссия десек болады. Осы жолдағы ең үлкен мотивацияңыз қандай?

– Ең үлкен мотивациям – адамның шын көңілден «Алла разы болсын!» деген алғысы. Бір науқастың жағдайы жақсарса, сол күні маған да ерекше қуаныш сыйлайды. Бұл мамандық – ауыр, бірақ адамдық тұрғыда өте бағалы жол. Әрбір науқастың өмірі үшін күресу – дәрігердің күнделікті миссиясы.

– Болашаққа қандай үмітпен қарайсыз? Қазақстан медицинасында не өзгерсе дейсіз?

– Болашақтан үлкен үміт күтемін. Елімізде жоғары деңгейлі медицина орталықтары көбейіп, өз мамандарымыз шетелге шықпай-ақ күрделі оталар жасай алатын деңгейге жетсе деймін. Әрі қарай шеттен келген емес, өзіміздің дәрігерлерге сенім артатын қоғам қалыптасса екен. Ал бұл үшін біз, жас мамандар, әрдайым оқып, жетіліп отыруымыз керек.

– Әңгімеңізге көп рақмет. Ісіңізге сәттілік тілейміз!

– Сіздерге де алғыс білдіремін. Халық денсаулығы – ұлт болашағы. Барша әріптестеріме табыс тілеймін!