«Қоғамдық тәртіп – бір күндік емес, өмірлік міндет»

Қазақстандықтардың қауіпсіздігі тәулік бойы қоғам тынышытығын тынбай күзетіп отырған полиция қызметкерлерінің қолында екені айтпаса да түсінікті. Осы орайда, біз Түркістан қаласы полиция басқармасының қызметкері Азамат Көпжасарұлымен әңгімелескен едік.

– Нұржан мырза, Түркістан қаласы бүгінде қауіпсіз әрі тыныш қала ретінде танылып отыр. Бұл сенім қалай қалыптасты?

– Иә, расында да Түркістан – еліміздің ең бейбіт, қауіпсіз өңірлерінің біріне айналды. Бұл бір күнде болған жағдай емес. Қауіпсіз қала қалыптастыру – күрделі әрі жүйелі процесс. Мұнда полиция қызметінің, әкімдік пен тұрғындардың өзара сенімге құрылған байланысының, құқықтық мәдениеттің өсімінің рөлі өте зор.

Біз Түркістанда «полиция – халық үшін» қағидатын нақты іске асырып келеміз. Бұл сөзбен ғана емес, күнделікті жұмысымызбен дәлелденіп отыр. Учаскелік инспекторлар халықпен күнделікті тығыз байланыста, тікелей коммуникация орнаған. Қаланың барлық аудандарында бейнебақылау құрылғылары орнатылды. Соның нәтижесінде қылмыс азайды, қауіптің алдын алу мүмкіндігі артты.

– Статистикаға сүйенсек, Түркістанда соңғы жылдары құқық бұзушылықтар едәуір азайған. Бұған не себеп?

– Иә, 2020 жылдан бері қылмыстық істер саны 30 пайызға дейін азайды. Бұл – үлкен көрсеткіш. Қылмыс азайып, тәртіп орнауы – көп фактордың жиынтығы. Біріншіден, полиция жұмысының форматы өзгерді. Біз репрессивті емес, превентивті тәсілге көшттік. Яғни, оқиға болмастан бұрын оның алдын алу мақсатын көздейміз.

Екіншіден, тұрғындармен тікелей байланыс артты. Біз WhatsApp, Telegram арналарын, Instagram парақшаларын қолдана отырып, тұрғындармен тәулік бойы қарым-қатынастамыз. Біздің қызметкер – жай ғана формадағы адам емес, қоғамның тыныштығын қорғаушы серіктеске айналды.

– Қоғам мен полиция арасындағы сенімді қалай қалыптастыра білдіңіздер?

– Сенім – бір күнде келмейді. Бұл – күнделікті ашықтық, адалдық, жауапкершілік арқылы қалыптасатын құндылық. Біз қазір халыққа бұйырып емес, ақылдасып, түсіндіру арқылы әрекет етеміз. Ескі көзқарас, мысалы, «полиция қорқыту үшін керек» деген түсінік жойылып келеді. Біз қазір қорғаушы, кеңесші, бағыт беруші ретінде қабылданамыз.

– Сіз басқаратын құрылымда жүздеген қызметкер бар. Полиция жұмысының көлеңкелі, еленбейтін жақтары туралы не айтасыз?

– Полицияның жұмысы – сырттай қарағанда бірқалыпты, бірақ ішінде өте ауыр әрі жауапты. Тәулік бойы қызметте жүреміз. Мейрам, демалыс, түн, күн демейміз. Әр іс – адамның тағдыры. Қателесуге болмайды. Бұл моральдық тұрғыдан өте күрделі.

Кейде отбасыңа, бала-шағаңа көңіл бөлуге уақыт жетпейді. Бірақ біз осыны саналы түрде таңдадық. Себебі, полиция болу – жай қызмет емес, бұл – өмірлік миссия.

– Түркістан – еліміздің рухани орталығы. Осы рух пен тәртіп бір-бірімен үндесіп жатқан жоқ па?

– Иә, өте орынды сұрақ. Түркістан – талай хандар мен би-шешендер жатқан қасиетті мекен. Мұнда бейбітшілік пен мәміле рухы ежелден қалыптасқан. Бұл тарих халықтың мінезіне де әсер еткен. Түркістандықтар – сабырлы, тәртіпті, заңға бағынатын азаматтар.

Біз осы тарихи жауапкершілікті сезінеміз. Бұл жердің әр көшесі, әр тасы тыныштықты талап етеді. Сол бейбіт мұраны қорғау – біздің тікелей борышымыз.

– Қоғамда полицияның бейнесі туралы түрлі пікірлер болады. Сіз әділеттілік қағидатын қалай сақтайсыз?

– Әділет – біздің жұмысымыздың өзегі. Егер бір полиция қызметкері әділетсіздікке жол берсе, бұл бүкіл жүйеге көлеңке түсіреді. Сол себепті бізде ішкі тексеріс, тәртіптік кеңес, қоғамдық бақылау өте қатаң. Сонымен бірге, әр қызметкердің ішкі этикасы, адамгершілігі, намысы бірінші орында тұруы тиіс.

– Жастар арасындағы құқық бұзушылықты азайту үшін қандай жұмыстар жүргізіліп жатыр?

– Жастар – қоғамның болашағы. Сондықтан олармен жұмысты біз ерте бастаймыз. Мектептерде құқықтық сабақтар өткіземіз, «Сотқа саяхат», «Жас сақшы» жобалары арқылы балаларды құқықтық ортаға бейімдейміз.

Қазірдің өзінде полиция кадеттері, мектеп инспекторлары жүйелі жұмыс істеуде. Балалармен ашық, еркін сөйлесіп, заңның қорқынышты емес, пайдалы екенін түсіндіреміз. Бұл – ұзақ мерзімді әсер беретін жұмыс.

– Полиция жұмысында қандай технологиялар қолданылып жатыр?

– Біз технологияны толық енгізіп жатырмыз. Түркістанда 800-ден астам бейнекамера жұмыс істейді. Жедел басқару орталығы тәулік бойы онлайн режимде бақылайды. Сонымен бірге, мобильді қосымшалар арқылы тұрғындардан арыз қабылдаймыз, электронды хат-хабар алмасу барынша жылдам әрі ашық.

– Қызметтен тыс уақытта өзіңіз қандай адамсыз?

– Мен де қарапайым адаммын. Үйде – әке, отбасында – отағамын. Бала-шағамен бірге болған сәт – мен үшін үлкен демалыс. Жұмыстан тыс уақытта кітап оқимын, спортпен шұғылданамын. Форманы шешкенде, біз де қоғамның бір мүшесіміз. Бірақ ішкі жауапкершілік ешқашан шешілмейді.

– Түркістан – көпұлтты қала. Бұл қауіпсіздікке әсер ете ме?

– Жоқ. Түркістанда түрлі ұлт өкілдері тату өмір сүреді. Бұл – біз үшін үлкен артықшылық. Біз үнемі этномәдени бірлестіктермен, Ассамблея мүшелерімен кездесіп, ортақ жұмыс істейміз. Жастар ұйымдарымен де тығыз байланыстамыз. Әр ұлт – біздің қоғамның байлығы.

– Халықтың пікірін қалай білесіздер?

– Біз сауалнама, әлеуметтік желі арқылы, сондай-ақ кездесулерде кері байланыс аламыз. Кәсіпкерлер де, тұрғындар да біздің ашықтығымызды жоғары бағалап отыр. Мысалы, Жандос есімді кәсіпкер: «Полиция бұрынғыдай суық емес, қазір көмектесуге дайын серіктес» дейді. Бұл біз үшін мақтаныш.

– Соңғы сұрақ: Түркістандағы қоғамдық тыныштықты қалай сипаттар едіңіз?

– Түркістан – бүгінгі таңда еліміздегі ең қауіпсіз қалалардың бірі. Бұл – мыңдаған адамның еңбегі, тұрғындардың мәдениеті, полицияның адалдығы, әкімдіктің қолдауы, қоғамның өзара бірлігі. Тыныштықты сақтау – бір ғана органның емес, бүкіл қоғамның міндеті.