Түркістанда қауіпсіздік – бірінші орында тұр

Заңды білетін, құрметтейтін, бағынатын қоғам – кез келген мемлекеттің тірегі. Түркістан қаласында дәл осындай қоғам қалыптасып келеді.

Полиция халықпен бірге жұмыс істейді, тұрғындар өз құқықтары мен міндеттерін түсінеді, ал мектептен бастап құқықтық сана мен жауапкершілік қалыптасады. Бұл – тек заңның ғана емес, сенімнің жеңісі.

Қазақстанның рухани астанасы саналатын Түркістан қаласы бүгінде тек мәдени-тарихи орда емес, қоғамдық тәртібі мен қауіпсіздігі сақталған, тұрақты даму жолына түскен тыныш мекенге айналды. Мұнда қылмыс деңгейі төмен, тәртіп сақшылары халықпен тығыз байланыста жұмыс істейді. Қала көшелерінде қауіпсіздік пен сенімнің атмосферасы сезіледі. Қоғамдағы бұл сенімді күй – күнделікті тынымсыз еңбектің, жүйелі алдын алу шаралары мен ашық диалогтың нәтижесі.

Қауіп жоқ, себебі қауіптің алдын алған жүйе бар

«Қауіпсіз қала» ұғымы бүгінде Түркістан үшін тек ұран емес – нақты деректермен дәлелденген, көрсеткіштермен негізделген жағдай. Түркістан облыстық Полиция департаментінің ресми мәліметіне сүйенсек, 2020 жылдан бері тіркелетін қылмыстық істер саны 30%-ға дейін төмендеген. Қаланың негізгі көшелері мен қоғамдық орындарында 850-ден астам бейнебақылау құрылғылары орнатылған. Бұл жүйе жедел басқару орталығы арқылы тәулік бойы бақыланып, кез келген құқық бұзушылық дер кезінде анықталып отыр.

Полиция мен тұрғындар арасындағы байланыс та жаңа сапаға көтерілген. Әрбір учаскелік полиция инспекторы өзіне тиесілі аумақ тұрғындарымен тікелей байланыста, әлеуметтік желілер мен мессенджерлер арқылы жедел кері байланыс орнатқан.

Біздің басты қаруымыз — сенім

Полиция бастығы Нұржан Ахметов: «Қауіптің алдын алу – қауіптен кейін әрекет етуден әлдеқайда маңызды. Бүгінде Түркістан полициясының жұмысында репрессивті тәсілдер емес, превентивті амалдар, яғни алдын алу шаралары басым. Біз әрбір учаскеде халықпен жұмыс істейміз. Әрбір учаскелік инспектор өз тұрғындарын таниды, олардың уайымын, мазасын біледі. Қала тұрғындары полицияға сенеді. Бұл – ең үлкен жетістік. Өйткені полиция мен халық бір бағытта қозғалғанда ғана қалада тұрақтылық орнайды».

Заңға бағыну – бейбіт қоғамның негізі

Түркістан – мыңжылдық тарихы бар көне қала. Бұл шаһар ешқашан қақтығыстар мен тартыстардың емес, бейбітшілік пен мәміленің, парасат пен сабырдың ордасы болған. Қазіргі таңда бұл тарихи рух пен бейбітшілік құндылығы жаңаша мәнге ие болып, қоғамдық т әртіп пен заңның үстемдігін қамтамасыз ету жолында нақты көрініс тапқан.

 «Бейбіт қоғам құрудың ең басты жолы – заңның үстемдігін сақтау. Түркістанда заңмен дауласудан гөрі, заңмен шешуге деген талпыныс басым. Бұл – құқықтық мәдениеттің жоғары деңгейде екенін көрсетеді. Сотқа түсетін азаматтық істердің көпшілігі медиация арқылы шешіледі. Ал қылмыстық істер бойынша қатаң жазадан бұрын қайта тәрбиелеу мен алдын алу тетіктері қолданылады. Қоғамдық тәртіпті бұзатын жағдайлардың азаюы – құқық қорғау органдарының халықпен әріптестік байланысының нәтижесі» дейді заңгер Айгүл Сейтқұл.

Түркістан – әлеуметтік тұрақтылықтың үлгісі

Түркістандағы қоғамдық тәртіп тек полиция қызметімен шектелмейді. Бұл – әкімдік, сот, білім беру, денсаулық сақтау, ҮЕҰ және тұрғындардың ортақ жауапкершілігімен қамтамасыз етілетін көпдеңгейлі жүйе.

 «Түркістан қаласының қауіпсіздігіне бір ғана фактор әсер етіп отырған жоқ. Бұл – мемлекеттік қолдаудың жүйелілігі, мәдени біртектіліктің беріктігі, және сенімге негізделген билік-халық қарым-қатынасы. Соңғы әлеуметтік зерттеулерге қарағанда, Түркістан тұрғындарының 87 пайызы өздерін қауіпсіз сезінеді. Бұл – аймақ деңгейінде өте жоғары көрсеткіш. Ең бастысы – халық полициядан қорықпайды, керісінше сенеді. Бұл – дамыған қоғамның көрсеткіші» дейді саясаттанушы Нұрсұлтан Айтжанов бізбен әңгімесінде.

Ал, мемлекеттік қызмет ардагері Берік Қаржаубаевтың айтуынша, қауіпсіздік – үйлесімді жұмыстың нәтижесі.

«Бүгінде Түркістан – үлкен құрылыс алаңы емес, заманауи қауіпсіз қаланың моделіне айналды. Бұл модельде қауіпсіздік пен қоғамдық тәртіп ерекше орын алады. Әкімдік, құқық қорғау органдары, қоғамдық кеңестер мен ҮЕҰ арасында күнделікті байланыс орнаған. Тұрғындардан түскен өтініштер, әлеуметтік желілердегі шағымдар дереу қаралып, полициямен бірлесіп шешім қабылданады. Бұл – әкімшілік пен құқық қорғау құрылымдарының шынайы әріптестігінің айғағы» дейді ол.

Құқықтық сана мектептен басталады

Қоғамдағы қауіпсіздік деңгейін ұзақмерзімді сақтау үшін жас ұрпаққа құқықтық білім беру, құқық бұзушылықтың алдын алу мәдениетін қалыптастыру аса маңызды. Осы бағытта Түркістан қаласындағы барлық мектептер мен колледждерде “Құқықтық тәрбие сағаттары”, “Сотқа саяхат”, “Жас сақшы” сынды бағдарламалар тұрақты түрде өткізіледі.

 «Қазіргі оқушы – ақпаратты жылдам қабылдайтын буын. Сондықтан құқықтық сауаттылықты ерте қалыптастыру қажет. Біз полиция қызметкерлерімен, прокурорлармен кездесу өткіземіз. Балалар заңның не екенін, оны бұзғандағы салдары қандай болатынын ерте түсінеді. Тәртіпті бала — тәртіпті азамат. Ал тәртіпті азамат ешқашан қоғамға қауіп төндірмейді. Сондықтан қауіпсіз қоғам құру – мектеп қабырғасынан басталады» дейді №44 мектеп директоры Салтанат Мұқатайқызы.

Халық не дейді?

Жандос Қалқаманов, кәсіпкер, Түркістан тұрғыны: «Түнде тыныш ұйықтау, балалардың мектептен қауіпсіз оралуы — кез келген ата-ана үшін маңызды. Түркістанда соңғы жылдары бұл бағытта үлкен серпіліс болды. Қазір полицияға хабарласуға ұялу деген жоқ. Учаскелік инспекторлар ашық жұмыс істейді. Әлеуметтік желіде белсенді. Бір сөзбен айтқанда, полиция – халыққа жақын, әрі сенімді қорғанымыз».

Түркістан – қауіпсіздіктің үлгісі

 Қылмыс деңгейі төмен, қылмыстың ашылу пайызы жоғары. Полиция мен халық арасында сенімге негізделген серіктестік бар. Құқықтық мәдениет мектептен басталып жатыр. Әкімдік, құқық қорғау органдары және қоғам бірлесе әрекет етеді. Халықтың қауіпсіздік сезімі жоғары. Түркістанға ешқандай қауіп жоқ. Өйткені бұл қалада қауіптің алдын алатын жүйе бар, заң мен тәртіп күзетте тұр, ал халық сеніммен, бейбіт өмірмен өмір сүруде.