Айтмағанбетова 2025 жылдың мамырында Қостанайдан Жезқазғанға көшіп келген. Оның айтуынша, қаланың инфрақұрылымдық жағдайы мен өмір сүру деңгейі қатты таңқалдырған.
«Судың түсі лай, фильтрден өтпейді. Адамдар улануда, онколог маман жоқ. Қала соғыстан кейінгідей күйде. Жұмыс жоқ, жұмысқа тұру үшін пара талап етіледі – осының бәрін видеоларымда көрсеттім», – деді белсенді Orda.kz-ке берген сұхбатында.
Көпшіліктің назарын аудартқан бейнежазбалардың бірі Жезқазғандағы көпсалалы облыстық аурухананың жағдайы туралы болған. Осыдан кейін, 18 маусым күні Әсел полиция департаментіне «түсіндіру әңгімесіне» шақырылған.
Кейін белгілі болғандай, облыс әкімі оған қарсы сотқа арыз түсіріп, сот Айтмағанбетованың пайдасына емес шешім шығарған – енді ол 495 мың теңге айыппұл төлеуге міндеттеліп отыр.
Белсенді бұл жазаны «шынайы мәселені көтергені үшін берілген жаза» деп есептейді.
