Рэпер Qurt әйелін аяусыз ұрып-соққан
Қазақстандық рэпер Qurt-тың (нағыз есімі – Дамир Қойшубаев) жұбайы Аружан Қойшубаева күйеуінің өзін соққыға жыққанын хабарлады. Оның айтуынша, оқиға 27 маусым күні таңертең болған.
Аружан Instagram парақшасында денесіндегі көгерген іздер мен жарақаттарды көрсете отырып фото және видео жариялады. Ол Қойшубаевтың өзін бір сағат бойы белдікпен ұрғанын, белдік үзіліп кеткен соң басқа затпен соққыны жалғастырғанын мәлімдеді.
«Пәтерден қаша алмай, айқайлай бастадым. “Көмектесіңіздер, өлтіріп жатыр” деп бақырған дауысымды көршілер естіп, сыртқа шығуға көмектесті», — дейді Аружан.
Ол бұл жағдайды жариялауға ұзақ уақыт бойы жүрексініп келгенін, себебі күйеуіне қатты бауыр басқанын айтады. Аружанның сөзінше, оқиғадан кейін Дамир Қойшубаев бірнеше досымен бірге келіп, одан шағымынан бас тартқаны туралы видео түсіруді талап еткен. Сондай-ақ оған қорқыту сипатындағы сөздер айтылғанын жеткізді.
«За нами уже выехали» жобасының хабарлауынша, оқиғаға байланысты полицияға ресми арыз әзірге түспеген.
Айта кетейік, Qurt бұған дейін Скриптонит, Niman және Kali секілді музыканттармен бірге жұмыс істеген.