Атырау облыстық Төтенше жағдайлар департаментінің хабарлауынша, өрт ошағын ауыздықтауға ҚР ТЖМ-не қарасты авиация мен жергілікті құрылымдар тартылған. Атап айтқанда, «Қазавиақұтқару» АҚ-ның МИ-8 тікұшағы оқиға орнына аттанып, облыс әкімінің орынбасары Қайрат Нұртаев пен ТЖД басшысы Нұрлан Жаңабаевпен бірге жағдайды көзбен бағалап қайтты.
Бүгінгі күннің өзінде тікұшақ арқылы төрт мәрте су төгіліп, жалпы 12 тонна көлеміндегі су қамысқа шашылған. Алайда аптап ыстық, қою өсімдік жамылғысы мен желді ауа райы тілсіз жаумен күресті күрделендіріп отыр.
Қазір төтенше жағдай қызметі, «Ақ Жайық» резерватының мамандары және құтқару авиациясы жұмыла әрекет етуде. Өрт сөндірушілер күндіз-түні тыным таппай жұмыс істеуде.