Батыс Қазақстан облысында әйел отбасына өзін ұрлап кетті деп айтып, шындығында басқа ер азаматпен қашып кеткен, деп хабарлайды NewsRoom+ақпарат агенттігінің тілшісі Stan.kz-ке сілтеме жасап.
Жоғалып кеткен келіншек күйеуі Мырзағалимен некелескеніне жеті жыл болыпты. Оның сөзіне қарағанда жары Гүлнұрдың бірінші жұбайынан бір ұлы болыпты. Алайда өзімен еріп келген баласын өз баласындай көріп, бауырына басқанын айтқан ер азамат. Кейін ерлі-зайыптылар тағы да үш баланың ата-анасы атанған.
"22 мамыр күні әйелім үйден кетіп қалды.
Балалар үйде жалғыз қалыпты, үлкенімнің жасы сегізде ғана. Анасы қайдан кетіп қалғанын білмеген. Кейіннен Гүлнұр өзінің ұрланғанын айтып, мені Ақжайық ауданына алып бара жатыр деп WhatsApp-пен хат жіберді. Бірақ ол жақтан таба алмадық. Біраз уақыттан соң ол бәрі дұрыс екенін айтты. Алайда мен полицияға хабар бердім", - дейді Мырзағали.
Полицейлер арыз түскенін растап отыр. Тәртіп сақшылары әйелді іздестіруге кірісіп кеткен.
"Біз көп балалы ананы ешкім ұрламағанын анықтадық. Ол басқа ер азаматпен танысқан. Әлгі ер адам Оралға келіп, әйелді Жанғалы ауданына алып кеткен. Қазір біз олардың блок-бекеттен қалай өтіп кеткенін анықтап жатырмыз", - дейді Орал қаласының полиция бөлімінің тергеушісі Нәлібай Бақдаулет.
Қашып кеткен әйел де, оның жаңа сүйіктісі де табылып, оқиғаға қатыстылардың. барлығы полиция бөлімшесіне жеткізіліпті. Полицейлердің мәліметіеше, бейтаныс азамат еш жерде жұмыс істемейтін ауыл тұрғын болып шыққан.
"Күйеуім ұратын. Менің оған деген сезімім сөнді, бұл туралы туыстарыма айтудан ұялдым. Балаларымды алып кетейін деп үлгермей қалдым. Қазір олар әпкемнің қолында. Жаңа күйеуім балаларым мен мені өз қамқорлығына аламын деп сөз берді", - дейді Гүлнұр.
Полицейлер олардың барлығы үйлеріне қайтарылғандығын атап өтті. Бұл жағдайға байланысты әкімшілік не қылмыстық іс қозғау заң бойынша қарастырылмаған көрінеді.
