Соғыс жылдарында Қазақстан кинематография орталығына айналған
Соғыс жылдарында республикада кинематография саласы айтарлықтай дамыды. Алматы киностудиясы мен эвакуацияланған «Мосфильм» және «Ленфильм» киностудияларының негізінде кейіннен «Қазақфильм» атанған шығармашылық орталық құрылып, 30 фильм түсірілді. Бұл туралы ҚР Мәдениет және ақпарат министрі Аида Балаева «Жеңістің естелігі: ұрпақтар мен халықтардың бірлігі» атты конференцияда айтты,- деп хабарлайды newsroom.kz
Іс-шараға ҚР Президенті Әкімшілігінің Ішкі саясат бөлімінің меңгерушісі Абзал Нүкенов, ҚР Мәдениет және ақпарат министрі Аида Балаева, Ресей Федерациясы Президентінің шет елдермен аймақаралық және мәдени байланыстар жөніндегі басқармасы басшысының орынбасары Антон Рыбаков, Ресей Федерациясының Жастар ісі жөніндегі федералдық агенттігі басшысы Григорий Гуров, екі елдің ғалымдары мен сарапшылары, сондай-ақ белсенді жастар қатысты.
Сол жылдары түсірілген фильмдер қатарында – «Два бойца», «Жди меня», «Ленинградцы», «Партизаны», «Батыры степей», «Сын бойца» және басқа да туындылар бар. Фильмдерге Михаил Жаров, Любовь Орлова, Николай Черкасов, Марина Ладынина сынды әйгілі актерлер қатысты.
«Соғыс жылдары қазақстандық мәдениет үшін өсу мен өрлеудің жаңа көкжиектерін ашты. Ел ішін шарпыған бұрын-соңды болмаған патриоттық рух пен биік мақсат – қазақтың бейнелеу және музыка өнерінің, театры мен киносының, поэзиясы мен әдебиетінің келбеті мен мазмұнын қалыптастырған басты факторларға айналды. Әрине, біз – бүгінгі ұрпақ – осының бәрін бағалап, қазіргі ұлттық мәдениетіміздің қалыптасуына апаратын бірегей тарихи кезең ретінде қабылдауымыз қажет», – деді А. Балаева.
1943 жылы «Қазақфильмде» режиссер Ефим Аронның «Белая роза» атты фильмі түсірілді. Онда жаралы офицердің рөлін Шәкен Айманов сомдады. Бүгінде «Қазақфильм» студиясы осы аңыз адам – актер әрі режиссер Шәкен Аймановтың есімін иеленіп отыр. Алматыда эвакуацияда жүрген кезінде Сергей Эйзенштейн «Иван Грозный» фильмінің бірінші бөлімін аяқтады.
1944 жылы «Ленфильм» мен «Мосфильм» өз мекендеріне қайтқаннан кейін, «Қазақфильм» студиясы еліміздің өнер қайраткерлерінің басшылығымен өз жолын бастады. Бұл кезең Қазақстанда ұлттық киноөндіріс негізі қалануына себепкер болды.
Конференция қатысушылары Ресей мен Қазақстан кинематографистерінің соғыс жылдарындағы ынтымақтастығы болашақтағы бірлескен жобаларға негіз болғанын атап өтті.