Бұл концерт композитордың 100 жылдығына арналған мерекелік іс-шаралар бағдарламасының бастамасы болды. Кеште ұлы тұлғаның құрметіне Мемлекет басшысының атынан гүл шоқтары табыс етілді.
Іс-шараға Жамбыл атындағы Қазақ мемлекеттік академиялық филармониясының Н.Тілендиев атындағы академиялық-фольклорлы этнографиялық «Отырар сазы» оркестрінің көркемдік жетекшісі және бас дирижері, Қазақстанның еңбек сіңірген қайраткері, «Парасат» және «Құрмет» ордендерінің кавалері Дінзухра Нұрғисақызы Тілендиеваның дирижерлік етуімен Еркеғали Рахмадиев атындағы академиялық филармониясының симфониялық оркестрі, Б. Байқадамов атындағы мемлекеттік хор капелласы қатысты.
Қазақстанның еңбек сіңірген қайраткері Дінзухра Нұрғисақызы Тілендиева:
«Бүгінгі концерт өте ерекше болады. Керемет әншілер әкемнің әйгілі әндерін орындайды. «Құстар әні», «Өз елім» әндері бүкіл халыққа тараған. Тіпті, халық әндері болып кетті.
Сондай-ақ, ұлы композитордың қазақ музыкасының алтын қорына енген туындыларын Қазақстанның еңбек сіңірген қайраткерлері Светлана Айтбаева, Жұбаныш Жексенұлы, Азамат Жылтыркөзов, Нұржан Жанпейісов, халықаралық байқаулардың лауреаттары Феруза Рахметова, Фархат Кубиев, Даяна Тілендиева орындады.
Қазақстанның еңбек сіңірген қайраткері Светлана Айтбаева:
«Бүгінгі концерт өте керемет өтіп жатыр. Дінзухра Тілендиева бастаған халық аспаптар «Отырар сазы» оркестрін шын жүректен құттықтаймын. Нұрағамыздың 100 жылдық мерейтойы құтты болсын. Және де мерейтойдың жалғасы 2 сәуір күні өтетін концертте Нұрғиса Тілендиевтің жаңа шығармасын орындайтын боламын. Ол кісінің мұрағатынан алып, Дінзухра екеуіміз ақылдасып, арнайылап 100 жылдыққа Тұманбай Молдағалиевтің сөзіне жазылған «Махаббат таңы» атты әнін дайындаған болатынбыз».
Қазақстанның еңбек сіңірген қайраткері, әнші Жұбаныш Жексенұлы:
«Бүгінгі шара менің ойымша Нұрғиса Тілендиевтің 100 жылдығының ашылуы деп айтуға әбден болатын сияқты. Нұрғиса атамыздың әндері біздің ата-анамыздың, біздің жүрегімізде. Сондықтан, бұл әндер – қазақ тұрғанша тұратын әндер».
Қазақ музыкасының дара тұлғасының мерейтойы тек еліміздің шеңберінде ғана емес, ЮНЕСКО және ТҮРКСОЙ сияқты беделді ұйымдардың қолдауымен халықаралық деңгейде де аталып өтеді. Жыл бойы Қазақстанның барлық өңірінде 100-ге жуық іс-шара өтеді. Атап айтсақ, көрмелер, концерттер, байқаулар мен фестивальдер ұйымдастыру жоспарланған.
Мерейтойлық бағдарламаның басты іс-шарасы – Қазақстанның Мәдениет күндері аясында Франциядағы ЮНЕСКО штаб-пәтерінде өтетін Нұрғиса Тілендиевтің 100 жылдығына арналған салтанатты концерт. Сондай-ақ АҚШ-та, әйгілі Карнеги-холлда, концерт пен көрме ұйымдастырылса, Бейжіңде «Құстар қайтып барады» концерті аясында композитордың әндері орындалады.