2025 жыл – Нұрғиса Тілендиевті еске алу жылы
ТҮРКСОЙ Халықаралық Түркі мәдениеті ұйымы 2025 жылды қазақтың ұлы композиторы, күйші, дирижер және халық әртісі Нұрғиса Тілендиевті еске алу жылы деп жариялады. Бұл туралы ұйымның бас хатшысы Сұлтан Раев мәлімдеді, деп хабарлайды Newsroom.kz.
Нұрғиса Тілендиевтің 100 жылдығына орай Қазақстан мен түркі тілдес елдерінде бірнеше мәдени шаралар ұйымдастырылады. Концерттер, ғылыми конференциялар, көрмелер және басқа да іс-шаралар жоспарланып отыр. Мерейтой ЮНЕСКО деңгейінде де атап өтіледі, бұл Нұрғиса Тілендиевтің шығармашылығының халықаралық маңыздылығын тағы бір рет көрсетеді.
Нұрғиса Тілендиев Алматы облысы Іле ауданында 1925 жылы дүниеге келген. Оның музыкалық мұрасы кең ауқымда таралған: 50-ден астам драмалық қойылымға, 19 көркем фильмге, 17 анимациялық фильмге және 14 деректі-хроникалық фильмге музыка жазған. Сондай-ақ, ол Абай атындағы Қазақ мемлекеттік академиялық опера және балет театрының дирижері, Қазақтың халық аспаптар оркестрінің бас дирижері, Қазақфильм киностудиясының музыка редакциясының бас редакторы, 1981 жылдан бастап «Отырар сазы» фольклорлық-этнографиялық ансамблінің көркемдік жетекшісі қызметтерін атқарған.
Нұрғиса Тілендиевтің шығармашылығы қазақтың ұлттық өнерін әлемге танытуға зор үлес қосып, оның туындылары бүгінгі күнге дейін халықтың сүйіспеншілігіне бөленуде.