Погон таққан перизат батылдығымен баурады

Погон таққан перизат батылдығымен баурады. Ерекше мамандықты таңдаған жандардың бірі – 34 жастағы полиция подполковнигі Гүлфара Құмарова.

Гүлфара жасөспірім кезінен-ақ полиция қызметкері болатынын білген.

— Өзімді формада елестетіп, осы жұмыстың менің байсалды әрі талапшыл мінезіме сай келетінін сездім, — деп еске алады ол жымиып.

Ата-анасы қызының таңдауын қолдады, ал үлкен әпкесі оның ант қабылдау рәсіміне қатысты. Осылайша, оның құқық қорғау органдарындағы жолы басталды.

Актөбе заң колледжін бітіргеннен кейін 21 жастағы Гүлфара кәмелетке толмағандар ісі жөніндегі инспектор болып қызметке кірісті. Бұл жұмыс оңай болмады: қолайсыз отбасылар, девиантты мінез-құлықты балалар, нашақорлар мен токсикомандар, ата-ана құқығынан айыру және жасөспірімдерді балалар үйіне жіберу жағдайлары жиі кездесетін.

— Алғашында қорқынышты болды: үлкен ұжым, қиын жағдайлар, ІІМ-нің барлық ережелерін есте сақтау қажеттілігі. Бірақ әріптестерім қолдау көрсетті, қорқынышым тез сейілді, — дейді Гүлфара.

Келесі екі жыл бойы ол Жедел басқару орталығында бейнебақылау инспекторы болып жұмыс істеді. Бұл жерде мұқияттылық пен төзімділік қажет болды.

— Бірде автокөлік ұрлығын жасаған қылмыскерді ұстауға көмектестік. "102" қызметіне қоңырау түскеннен кейін біз көліктің қозғалыс бағытын бақылап, бір камерадан екіншісіне ақпарат жіберіп отырдық, кейін мәліметтерді жол полициясы қызметкерлеріне жеткіздік. Нәтижесінде қылмыскер ұсталды.

Бейнебақылаудың қайғылы жағдайлардың алдын алған кездері де болды.

— Бірде үйдің терезесінен ер адамның әйелін ұрып, оған пышақпен қоқан-лоқы көрсетіп жатқанын байқадым. Дереу жол полициясын шақырып, мүмкін, оның өмірін құтқарып қалдым, — деп еске алады ол.

Гүлфара соңғы алты жыл бойы Атырау қалалық полиция басқармасының штабында жұмыс істейді. Оның міндеттеріне ведомствоның жұмысын жоспарлау, жедел қызметті талдау және штабтық бөлімшелерді үйлестіру кіреді.

— ІІМ-дегі қызмет ішкі беріктікті талап етеді. Бұл – демалыссыз, мейрамсыз, кез келген ауа райында сыртта жүріп атқарылатын жұмыс. Көп адамдар бұл қызметтің қаншалықты қиын екенін түсіне бермейді, — дейді ол.

Гүлфара болашақ жұбайымен оқу кезінде танысты. Ол бір курс жоғары оқыды, оқу бітірген соң екеуі отбасын құрды. Қазір олардың екі баласы бар, ал жолдасы – полиция майоры. Оның отбасында ІІМ-дегі қызмет – әулеттік дәстүр: әкесі, полиция полковнигі Қабдығали Өтегенов, балалары мен немерелеріне үлгі болып келеді.

— Полицияда ерлерге немесе әйелдерге арналған жұмыс деп бөлінбейді, бірақ ер адамдар әрдайым әріптестерін қолдайды. Көбісі бұл қызмет әйелдерге арналмаған деп есептейді, алайда қару мен жауынгерлік әдістерді жетік меңгерген қыздар да бар, — дейді Гүлфара.

Демалыс күндері ол өзін толықтай отбасына арнайды – сүйікті тағамдарын дайындайды, балаларымен серуендейді, кітап оқиды және спортпен шұғылданады.

— Біз, полицияда қызмет ететін әйелдер, бәрімен бірдейміз: жұмыс істейміз, жақындарымызға қамқорлық жасаймыз, көңілді де оптимист болып қаламыз, — дейді ол. — Полицияда мансап туралы армандайтын барлық қыздарға айтарым: қорықпаңыздар! Төзімділік, сенімділік және өз кәсібіңізге деген сүйіспеншілік кез келген қиындықты жеңуге көмектеседі. Ал, 8 наурыз қарсаңында барлық әйелдерге гүлдену, мансаптық табыс және шексіз әйел бақытын тілеймін!