Жасанды интеллект мемлекеттік қызметкерлерді жұмыстан шығаруы мүмкін
Цифрлық даму министрі Жаслан Мәдиев жасанды интеллектті енгізу нәтижесінде мемлекеттік қызметкерлер арасында қысқарту болуы мүмкін бе деген сұраққа қатысты өз пікірін білдірді, деп хабарлайды newsroom.kz Tengrinews-ке сілтеме жасап.
"Алдымен айтайын: қанша қызметкер қысқаратыны туралы нақты болжам жоқ. Бірақ бұл жерде түсіну керек, жасанды интеллект технологиялары ең алдымен қызметкерлерді қайталанатын тапсырмалардан босатып, ресурстарды интеллектуалды, шығармашылық, стратегиялық жұмыстармен айналысуға бағыттауға мүмкіндік береді. Яғни, адам ақылы қажет болатын жерлерде," – деді Мәдиев үкіметтің көшпелі отырысынан кейінгі брифингте.
Министрдің айтуынша, бұл тәсіл мемлекеттік аппараттың тиімділігін арттыруға бағытталған.
"Белгілі бір салаларда 20-30 пайыздық қысқарту болуы мүмкін деп айтуға болады, біз дәл қазір осындай есептеулер жүргізіп жатырмыз. Колл-орталықтар сияқты салаларда оңай есептеуге болады, себебі ол жерде қоңырауларды арнайы дайындалған жасанды интеллект қабылдап, қажетті жауаптарды беріп, анықтамалар жіберіп отырады," – деп атап өтті цифрлық даму министрі.
Бұл тақырып бойынша өз пікірін қаржы вице-министрі Әсет Тұрысов та білдірді.
"Қазіргі кезде қолмен атқарылып жатқан көптеген жұмыстар жасанды интеллекттің көмегімен жылдам әрі тиімді орындалатын болады. Бірақ, дұрыс атап өткеніңіздей, кейбір жағдайларда оптимизация мәселесі туындауы мүмкін. Дегенмен, менің ойымша, мемлекеттік қызметкерлердің қандай да бір қайта бейімделуі сөзсіз жүзеге асырылатын болады," – деп қорытындылады Тұрысов.